ألاعيب إبليس.. إزاي استخدم الإخوان و مخابرات دول كبري الأزمة الاقتصادية لتعطيل السيسي

تخيل كدا.. تنظيم سياسي فضل من الخمسينات يحاول يوصل للحكم.. وبعد السنين دي كلها وصله.. ولكن لما الشعب يكشف أمره ويعرف أهدافه غير الوطنية يقرر أنه يطيح بيه من السلطة.. ولما فعلا التنظيم دا يسقط من السلطة.. هل تتوقع منه أنه يسكت... أو يبطل يطارد اللي استبعدوه من قمة الهرم السياسي.

أهو دا بالظبط اللي عملته جماعة الإخوان الإرهابية مع النظام السياسي الحالي.. اللي في كل مرحلة ولما يحقق إنجاز أو يحقق مستهدف اقتصادي إيجابي برضوا يفضل يحاول يشوهه.

لسه ٣٠ يونيو واللي عمله السيسي في الإخوان بأنه وقف جنب شعبه وتصدى لإرهاب الجماعة منغص عليهم حياتهم وواجعهم اوي.

وعلشان كدا أي تقدم إيجابي على مستوى الاقتصاد أو الشأن الدولي أو غيره.. الإخوان بيستخدموا كل أدواتهم الإعلامية علشان يشوهوه.

أوعى بس تفتكر أن الجماعة بتعمل كدا لوحدها. لأ دا ساعدها وبيساعدها في دا منظمات دولية وأجهزة استخباراتية وغيره.

وعند أي أزمة دولية لازم يهاجموا السيسي باعتباره الغلطان والمسئول عن إنهيار وتغير اقتصادات العالم.. حتى لو هو قدر يعدي من ازمات كتير ويتجاوز محن اقتصادية كتيرة لكن هو برضوا في نظرهم اللي غلطان.

في عصر الرئيس السيسي.. مصر اتحولت لمركز إقليمي للطاقة والغاز بفضل الاكتشافات الحديثة.. مصر قدرت تنتصر على الإرهاب في سيناء وهتحولها لأكبر مركز تجاري وزراعي في المنطقة..  وقدرت كمان تزرع ملايين الأفدنة عشان تحقق الاكتفاء الذاتي.. وبداية حلم تصدير سلع ب 100 مليار دولار.

وعلشان كل دا كان في صالح النظام السياسي الحالي شعبيا.. الدنيا قامت وماقعدتش.. والجماعة وظفت كل ابواقها الإعلامية ومنصاتها علشان تحاول تنسف أي مجهود بتقوم بيه الدولة.. ومحاولات الكذب مابطلتش حتى الآن.

كمان أجهزة الاستخبارات الدولية اللي محمية فيهم الجماعة شافوا أن صعود مصر وتوسع نشاطها الاقتصادي هايخلي ليها دور مهم على المستوى الدولي.. وعلشان كدا دعمت الجماعات المسلحة وغذتهم علشان الحرب مع الإرهاب تطول.. ودعمت الوسائل الإعلامية للجماعة علشان يستنذفوا مصر وإعلامها.

ولما جت الأزمة الاقتصادية الأوكرانية.. واللي أثرت على العالم كله ومنهم مصر.. دخلت الجماعة ساحة الحرب لكن بشكل مباشر وهو أنها جمعت الدولارات من السوق السوداء علشان تخلق أزمة وكمان صدرت منظمات التصنيف الدولية اللي ليها أغراض تقارير سلبية على مصر ودا كله بهدف إسقاطها.

لكن دا كله ماقدرش يكسرنا.. لأ وكمان قدرنا ندخل البريكس اللي بيعتبر شهادة بقدرة الاقتصاد المصري وقوته.. الحرب لسه مكملة من الإخوان وأحنا قد التحدي.