قنبلة البنك المركزي اللي هتلم "تعابين الدولار".. تحرك صادم لتُجار العملة

 
المعلومات اللى عندنا بتقول ان البنك المركزي بيحضر لمفاجأة هتخلى تجار العملة والمضاربين على الدولار يدخلوا جحورهم وممكن ميطلعوش منها تانى أبدا.. والمفاجأة دي هتقضي على السوق السودا للعملة ومش هتخلى حد يبيع دولار واحد بعيد عن القنوات الرسمية في البنوك وشركات الصرافة المعتمدة.. فيا ترى ايه اللى بيحضر ليه البنك المركزي؟ وازاى هيتلاعب بتجار العملة والمضاربين؟ وامتى هيعلن عن المفاجأة ؟ وهل فعلا ممكن ينهى أزمة السوق السودا في مصر؟ 
 

 
فيه حالة من حالات الترقب بيشهدها سوق الصرف في الأيام الأخيرة.. وبعد ما كان سعر الدولار في السوق السودا ارتفع بشكل كبير الأسبوع اللى فات.. رجعت الأوضاع تتشقلب تانى وحصل تراجع كبير في سعر العمل الأمريكية بسبب بعض الأخبار اللايجابية اللى حصلت ومنها طبعا انضمام مصر لتجمع بريكس وفرص دخول اتفاقيات مبادلة عملة مع دول التجمع وكمان مع بعض القارات الحكومية اللى هيكون ليها مردود واضح خلال الأيام الجاية على الحصيلة الدولارية اللى بتحاول مصر تجمعها الفترة الجاية. 
وفى وسط انشغال سوق المال والاعمال بتداعيات انضمام مصر لبريكس وتأثير ده على الاقتصاد المصري كان رجالة البنك المركزي بيجهزوا لحدث كبير وضخم هيهز السوق السودا للدولار وهيعمل انقلاب حرفيا في أزمة نقص العملة اللى بتعانى منها مصر وهيخلى الجنيه يسترد عافيته ويرجع يناطح من جديد في العملات الأجنبية التانية.

والمفاجأة اللى بيتم التجهيز للإعلان عنها خلال الفترة الجاية بيشرف عليها محافظ البنك المركزي المصري وبيتابعها بشكل مستمر الرئيس عبدالفتاح السيسي لأنها خطوة فعلا مع بريكس ممكن يريحوا مصر من صداع الدولار للأبد. 
وفى حدود المعلومات المتاحة فالبنك الركزي بيجهز حاليا لمشروع مؤشر الجنيه الى بيعتبر فرصة هامة ويمكن تكون الأهم لإنقاذ العملة المصرية من دوامة التعويم ومن الصراع غير المتكافيئ مع الدولار.. ومشروع مؤشر الجنيه ده باختصار ان العملة المصرية قيمتها مش هتكون مربوطة بس بالدولار ولا هيتم تحديد سعره قياسا بالمعاملات التجارية اللى بتتم بالعملة الامريكية ولكن هيتم ربطه بسلة من العملات جارى تحديدها ومنها الين الياباني واليوان الصيني والروبل الروسي والجنيه الإسترليني واليورو بالإضافة كمان لبعض المعادن النفيسة زي الدهب والفضة وغيرهم

طب وده هيفيد الجنيه ازاى ؟ 
هقولك لو انت متابع الجنيه بقالوا أكتر من سنيتن بيعانى قدام الدولار وحرفيا من بعد الحرب الروسية الأوكرانية الدولار مسح الأرض بكل عملات العالم بعدا ما استخدمته الولايات المتحدة الأمريكية كسلاح في حربها ضد الروس وطبعا الجنيه المصري اتاثر بده وقيمته انخفضت بنسبة 100 % تقريبا قدام الدولار وده اللى خلا البنك المركزي يفكر في مشروك لفك الارتباط بالدولار ويحرر الجنيه من نفوذ العملة الأمريكية والمؤشر ده لما يتعمل هيبقا زي بورصة كده كل يوم سعر الجنيه بيتحدد بناء على قيمته قدام سلة العملات اللى هيتربط بيها 
يعنى من الآخر كده احنا هنكون قدام جنيه جديد تماما جنيه بيودع مرحلة الارتباط بالدولار اللى بقالها اكتر من 60 سنة وبيبدأ مرحلة جديدة هتخليه يقدر يقف على رجليه من جديد وما يتعرضش لأى ضغوط من العملة الأمريكية أو غيرها من العملات.