قرار مرتقب هيقضي على أزمة الدولار.. السر في "جنيه مصر الجديد"

اوعا تفكر الحكومة نايمة على ودانها ومش بتفكر فى حلول للمشاكل والأزمات الاقتصادية الصعبة اللى بتعاني منها مصر.. واوعا تصدق كلام الاخوان ولجانهم الاليكترونية ان النظام مكبر دماغه ومش مهموم بمشاكل الناس.. بالعكس الحكومة وبتعليمات مباشرة من الرئيس السيسي شغالة بكل قوتها وبتحاول تشوف حلول خارج الصندوق لأزمة قاسية زي أزمة نقص العملة.. وفى الايام الأخيرة بتحط الرتوش الأخيرة على قرار هيقضى باذن الله على أزمة الدولار وهيعيد للجنيه المصري قيمته وهيخلي الأسعار ترجع زي ما كانت قبل اندلاع الحرب الروسية الاوكرانية.. فيا ترى ايه القرار الحكومي المنتظر؟ وازاى هيأثر على أزمة نقص السيولة الدولارية؟ وهل الحكومة هتقدر تنفذه الفترة الجاية؟
 
خطوة الانضمام لتحالف بريكس واحدة من خطوات كتير مصر كانت شغالة عليها الشهور اللى فاتت لحل أزمة نقص العملة، والرئيس السيسي بذل جهد كبير وعمل اتصالات على أعلى مستوى لتسهيل قبول ملف مصر فى بريكس وحتى الناس اللى حاولت تقلل من خطوزة عظيمة زي دي تواروا خجلا وهما بيشوفوا دول وبلاد كبيرة تم رفض طلبها بالانضمام لبريكس.
وجنب بريكس فيه خطوات تانية هيتم الاعلان عنها خلال أيام هيكون ليه مردود ايجابي عظيم على أزمة نقص العملة وهتوفر للبلد مليارات الدولارات ومن الخطوات دي خطوة الاعلان عن مؤشر الجنيه اللى هيخلى الجنيه المصري قيمته تتحدد بناء على عملات تانية كتيرة غير الدولار زي الين واليوان والروبل والجنيه الاسترليني واليورو وبعض المعادن النفيسة زي الدهب وغيره من المعادن.
حد هيسال يعنى ايه أهمية  مؤشر الجنيه ده ؟
بص يا سيدى ده مشروع كبير وضخم البنك المركزي شغال عليه بقاله حوالى سنة تقريبا من وقت ما اعلن عنه محافظ البنك المركزي حسن عبدالله فى المؤتمر الاقتصادي السنة اللى فاتت .. وده تقدر تقول عليه كده جنيه مصري جديد هيتحرر من نفوذ الدولار وهيفك الارتباط مع العملة الأمريكية اللى بدأ من سنة 1962 ولسه مستمر لحد دلوقتي
وده هيفيدينا بايه ؟ 
سؤال مهم .. لو حضرتك متابع الجنيه المصري من بداية 2022 ولغاية دلوقتى بيعانى معاناة شديدة قصاد الدولار وسعر الجنيه انخفض بحوالى 100% تقريبا من قيمته واطلاق مؤشر الجنيه هيخلى قيمة العملة المصرية ما بتتحددش بس على اساس الدولار ولكن بناء على سلة تانية من العملات الأجنبية وده هيخلى الجنيه يقيم بسعره العادل خصوصا انه وفقا لتصريحات رئيس الحكومة الدكتور مصطفى مدبولى الجنيه مقيم بأقل من سعره بسبب شح العملة الأجنبية. 
وبيسعى البنك المركزي  لإطلاق مؤشر الجنيه المصري عشان يكون فيه سعر صرف حقيقي للعملة المحلية بدلا من الاعتماد على عملة رئيسية زي الدولار لوحدها وده هيخلى فيه صورة يومية حقيقية لمدى ارتفاع أو انخفاض الجنيه المصري عن قيمته العادلة لتغيير ثقافة ارتباط سعر الصرف المحلي بالدولار الأمريكي واللى بقاله أكتر من 60 سنة. 
وأكيد كلنا شايفين ازاى الدولار حاليا بيتحكم وبيتلاعب بأسعار عملات عدد كبير من دول العالم وبيستغلها أسوأ استغلال سواء اقتصايا وسياسيا وبيأثر على سياسات اقتصادات الدول وعشان كده مصر فكرت في مؤشر نسبي لقيمة الجنيه لمعرفة القيمة الحقيقة للعملة الوطنية، وده افضل من تحكم السوق السوداء وان المضاربين وتجار العملة هما اللى بيتلاعبوا في أسعار الدولار داخل السوق المصري. 
طب وايه اللى مأخر مصر فى اطلاق مؤشر الجنيه لما هو مهم أوي كده؟ 
الموضوع مش سهل ومحتاج تعاون مع عدد كبير من البنوك المركزية واتفاقيات بيتم التحضير لتوقيعها خلال ايام قليلة وفيه اتصالات مع أكتر من بنك مركزي لدراسة الموضوع من كل جوانبه والاستفادة من الخطوة دي اللى هتتبعها خطوات تانية مهمة وهتساهم فى حل أزمة الدولار ومنها تفاقيات مبادلة عملات وطنية بين مصر وعدد من الدولار هيتم فيها التخلى عن الدولار واستبدال المعاملات التجارية بعملات محلية يعنى مصر مثلا لو هتستورد قمح من روسيا مش هتدفع تمنه بالدولار ولكن بالروبل يعنى سعره هيكون ارخص وكمان هتخفف الضغط على الاحتياطي النقدي من العملات الأجنبية فى البنك المركزي وهكذا مع باقي الدول اللى هتوقع معاهم اتفاقية عملات