أعرف تقدر تسحب كام دولار من الفيزا وأنت خارج مصر؟

لو أنت مسافر لأي دولة في العالم.. فـ أنت لازم لازم يكون معاك عملة الدولة اللي أنت مسافر ليها.. يعني لو رايح دولة من دول الاتحاد الأوروبي هاتسحب يور.. وفي دول زي أمريكا محتاجلها دولار..  وفي دول زي الخليج محتاج يكون معاك ريال أو دينار حسب كل دولة.

طيب أنت علشان يكون معاك أي من العملات دول فكل اللي عليك أنك تروح البنك أو مكاتب الصرافة وتحول الفلوس من مصري لعملة الدولة اللي أنت رايحها.

لكن بسبب طلبات العملاء الكتيييييير اوي في البنوك للحصول على الدولار أو الريال سعودي الأسابيع اللي فاتت بسبب رغبتهم في السفر خارج خارج مصر لأسباب مختلفة منها حضور مؤتمرات أو للسياحة أو سداد مصروفات دراسية أو علاج، جه قرار البنوك بتحديد بعض الإجراءات للحصول على العملات بتاعة الدولة اللي أنت رايحها.

يعني علشان تروح البنك تغير العملة من الجنيه المصري لدولار أو يورو أو دولار.. فلازم تقدم للبنك  صورة من تذكرة السفر والتأشيرة، ودا علشان مايكونش في شبهة عليك علشان ماتغيرش العملة في السوق السودا.

طيب الخيار التاني..  وهو لما تكون أنت هناك.. في أمريكا مثلًا.. ومحتاج أنك تسحب دولار من كارت الخصم المباشر اللي معاك... تقدر تسحب كام دولار ويوازي قد اية بالجنيه المصري.

هنا بقى نحب نقولك أن الموضوع بيختلف من بنك للتاني.. وبشكل عام فالبنوك خفضت حدود السحب

طيب ولية البنوك عملت كدا

السبب هو إساءة استخدام المواطنين للسحب خارج مصر.. لأن كان الشخص يسحب دولارات كتيرة من بطاقة الخصم المباشر ودا أثر على وفرة الدولة هنا في مصر بسبب انخفاض الحوالات.

وكمان أغلب المعاملات الشرائية خارج مصر بتكون بالفيزا.. والأغلب أن أي شخص ممكن مايسحبش كاش.

وتاني بنقول لحضراتكم.. حدود السحب النقدي خارج مصر بتختلف من بنك للتاني

يعني في بنك مصر.. ففي بطاقة كلاسيك فتقدر تسحب ما يعادل 100 دولار بحد أقصى يوميا أو شهريا من عملة الدولة اللي أنت مسافر ليها .. ونفس الحدود دي متاحة لسداد المشتريات إلكترونيا.

وفي كمان بطاقة جولد.. ودي بتسمحلك تسحب نقدي ما يعادل 100 دولار بحد أقصى يوميا أو شهريا من عملة الدولة المسافر لها العميل، وما يعادل 200 دولار متاحة لاستخدامها للمشتريات إلكترونيا يوميا أو شهريا.

وفي البنك الأهلي المصري.. فتقدر تسحب نقدي ما يعادل 2500 جنيه بحد أقصى يوميا أو شهريا من عملة الدولة اللي أنت مسافر ليها العميل، وما يعادل 10 آلاف جنيه للمشتريات.
ولو معاك بطاقة جولد فمسموح ليك تسحب  ما يعادل 2500 جنيه بحد أقصى يوميا أو شهريا من عملة الدولة اللي أنت مسافر ليها العميل، أو ما يعادل 25 ألف جنيه للمشتريات يوميا أو شهريا. وتقدر تطلع على بقية البطاقات ومقدار السحب من مواقع البنوك.