قبل فلوسك ماتروح.. خلو بالكم من أحدث وسيلة نصب
كل الناس بتحب الفلوس والمكسب خاصة لو فيه ازمة اسعار وغلاء زي اللي عندنا دلوقتي ودا اللي بيستغله النصابين والمستريحين والجهات المجنولة عشان تسرق فلوس الناس تحت أي مسمى وبأكتر من طريقة.. لكن دلوقتي طرق النصب اتطورت بشكل كبير وبقت بتتعامل مع نفسية الإنسان وسلوكه وحسب مبدأ علمي بحيب اللي هيسرق متشكش فيه خالص وتطمن له لغاية ماتديه تحويشة العمر.. تعالوا نشوف أحدث وسيلة نصب عابرة للقارات وكتير من المصريين وقعوا فيها وخسروا فلوسهم بسبب مكر النصاب والطمع في الكسب المريح.
في الفترة الأخيرة انتشرت مقاطع فيديو وبوستات عن عمليات نصب غريبة بتم بنفس الأسلوب لكن المرة دي الشخص اللي جاي يسرق فلوسك دارسي علم نفس كويس جدا وبيرخي لك الحبل على الأخر وبيخليك انت اللي تديله فلوسك بايديك وكمان تلح عليه عشان ياخده زي فكرة المستريحين لكن المرة دي على علم وذكاء شوية.. الحكاية بتبدأ من رسالة على الواتس من رقم خليجي يعني مش مصري بيقولك انت كسبت مبلغ معين وليكن ألف جنيه عشان كنت مقدم في لعبة أو مسابقة أو حاجة وكسبت وتلاقي حد بيكلمك ويقولك انت كسبت المبلغ وعشان هو دارس علم نفس مش هيطلب منك حاجة تثير خوفك وكل اللي عايزة رقم حساب أو محفظة كاش يحولك عليها المبلغ ولأن دي مش بيانات سرية انت هتقول في نفسك أنا مش خسران حاجة وهتديه الرقم اللي هيحولك عليه الفلوس وفعلا بعد دقايق بتلاقي المبلغ في حسابك أو محفظتك وإنت مش هتصدق غير لما تستعلم عن رصيدك أو تسحب الفلوس وتبقى في إيدك.
بعدها انت هتحتار في اللي حصل فتلاقيه بيكلمك ويقولك انت قدمت في مسابقة أو وظيفة او اشتركت في ابلكيشن من فترة طويلة وطلبت جي عليه الموافقة والدور ولأن الفلوس بتعمي هتقوله أه أنا قدمت حتى لو مقدمتش وبعدها هتلاقيه بعتلك استمارة فيها اسمك بالكامل والمرتب وبينات تانية فانت بتتأكد إن الناس دي حقيقية وبعدها بيعرض عليك الشغل بطريقة سهلة وبيقولك احنا بنشتغل في كل حاجة أون لاين ومنها مواقع السوشيال يعني لو مثلا عملت 20 لايك على بوست او فيديو معين هتاخد جنيه على كل لايك و3 جنيه على كل شير ولانك مجرب هتجري تعمل كده وهتلاقي الفلوس اتحولتلك ودا كله والنصاب بيسحبك بالراحة وبيخدرك وانت مش عارف أو لأنك مش خسران حاجة لغاية دلوقتي بالعكس انت حاسس إنك وقعت على كنز وعشان انت صابر ربنا بيكافئك على صبرك.
المهم بعدها الأمور بتدخل في الجد بقى بعد ماتكون جبرته الراجل المجهول اللي عاوز يكسبك وخلاص وانت فاكره السما بعتته ويقولك لو حولت 5 الاف مثلا في يومين هنحولهملك 10 الاف ولانك وثقت فيهم هتبعت والمفاجأة هتلاقي ال10ألاف جنيه في حسابك بالفعل هيرجع يقولك لو حولت 20 هتاخد 25 الف خلال 24 ساعة وهتحول وهتلاقي المبلغ بالزيادة وبعدها لما تكون قربت تستوي هيقولك لو جبت حد يحول عن طريقك هتاخد نسبة محترمة على المبلغ بتاعه وطبعا بتجري على صحابك وحبايبك تقولهم وهيحصل معاهم اللي حصل معاك وهياخدوا فلوس كتير.
النصاب هنا شغال على عريزة الطمع والمكسب السهل وقدر يوصلك ويوصل صحابك لدرجة الثقة الكبيرة وبعدها يضرب ضربته الكبيرة هتلاقيه حضرتك يقولك لو حولت 100 ألف جنيه هتاخد 125 ألف طبعا إنت ماهتصدق وعشان مجربهم وعمرهم مانصبو عليك او خالفوا كلامهم هتبعت لكن المرة دي مش هتلاقي فلوس وهتلاقي رقم الواتس اختفى والابلكيشن اختفى وكل فلوسك وفلوس صحابك راحت عليكم.. لأن مفيش مكسب بالسهل ومحدش بيرمي فلوسه كده واهلنا زمان قالوا الحدادية مش بتحدف كتاكيت.
