5 أسباب تؤكد الانطلاقة الكبرى في الاقتصاد المصري
ياترى الاقتصاد المصري رايح على فين وايه سبب تفاؤل مؤسسات دولية ومحلية بانطلاقة كبري في الفترة الجاية وايه الميزة اللي هتخلى مصر تطلع بسرعة الصاروخ في كل القطاعات الاقتصادية وازاي دا ممكن يتحقق في الظروف الصعبة الحالية.. خليكم معانا لآخر الفيديو وهنشرح الأسباب بالتفصيل
طبعا لما تيجي تتكلم عن تقدم كبير في الاقتصاد وتوقعات انطلاقة ضخمة وانت وسط أزمة طاحنة ممكن ناس كتير ما تصدقش وتفتكر انك بتبالغ وخلاص لكن في الاقتصاد كل حاجه بالارقام والمؤشرات وواحد زائد واحد يساوي اتنين وحسب لغة الاقتصاد والسوق مصر هتنطلق في الفترة الجاية واقتصادها هيكون الاهم في المنطقة.
أول سبب لانطلاق الاقتصاد المصري هو الانضمام لبريكس ودي خطوة كتير مننا مش عارفين قيمتها لكن في الحقيقة هتحل مشاكل كتير عندنا مش بس في الدولار لكن في فتح الأسواق الواسعة الصادرات المصرية والتصدير لسوق فيه اكتر من 3 مليار مستهلك بالإضافة لتطوير الصناعة المصرية من خلال الشراكات الاقتصادية مع دول البريكس واستثمار الدول الأعضاء في السوق المصري اللي مليان فرص في كل المجالات والخبراء بيتوقعوا انطلاقة كبرى في الاستثمار الصناعي والزراعي وفي التعدين والطاقة والبنية التحتية استثمارات هتكون بالمليارات وشفنا حجم الاستثمارات الروسية والهندية والصينية والخليجية في منطقة قناة السويس حتى قبل الانضمام لبريكس.
تاني سبب هيخلي الاقتصاد الوطني ينطلق هو انطلاق مؤشر الجنيه واللي هيعيد الميزان المقلوب الجنيه المصري وهيرجعله قيمته بين العملات العالمية وهيهليه يستقر على سعر واحد ووعادل ودا كفيل إنه يفتح أبواب الاستثمار على مصراعية للمستثمرين حتى من خارج بريكس مع تنوع المنتج الاقتصادي المصري وكلنا شفنا حجم الفرص المتاحة في قطاع زي السياحة مثلا وقطاع الضيافة ومشروعات بمليارات الجنيهات بتتنفذ في الساحل الشمالي والعلمين الجديد وكان آخرها امبارح بإعلان شركة إماراتية تنفيذ مشروع سياحي ب3 مليار جنيه في الساحل الشمالي المصري بعد القفزة في اعداد السياح في الموسم الحالي ومتوقع منطقة الساحل تبقى عاصمة السياحة في العالم في السنين الجاية.
تالت سبب لانطلاق الاقتصاد المصري هو اكتمال آلاف المشروعات الخدمية والصناعية والبنية التحتية وقرب دخولها الخدمة وهتضيف قيمة كبيرة مضافة للاقتصاد المصري سواء مشروعات صناعية زي مدينة طربول اكبر مدينة صناعية في الشرق الأوسط ومشروع الدلتا الجديدة ومشروعات توشكي واللي هتغير شكل الاقتصاد في اقرب وقت لما تخلص.
رابع سبب من اسباب انطلاقة الاقتصاد المصري هو تصحيح النظام المالي المصري ووضع خطة طموحة لزيادة تدفقات وايرادات الدولة من العملة الصعبة واللي هتوصل اكتر من 200 مليار دولار سنويا وفق بيانات الحكومة وحسب بيانات السوق والمؤسسات الأجنبية اللي تنبأت للاقتصاد المصري أنها يحتل السابع عالميا في غضون سنين معدودة ودا بفضل التنوع وهي دي الميزة اللي بتميز بيها مصر واللي فيها فرص تغري أي مستثمر زي الصناعة والتجارة والسياحة والبنية التحتية والمالية والزراعة والموانئ وقناة السويس والخدمات اللوجستية والقطاع الاخير لوحده قادر ينقل مصر نقلة تانية بفضل موقعها الجغرافي المتميز ومشروعات الموانئ والنقل الحديثة اللي نفذتها الدولة.
اخر سبب لانطلاق الاقتصاد المصري هو تعلم الحكومة والدولية ازاي تتعامل مع الأزمات الدولية وازاي تسوق نفسها كدولة واعدة بين التكتلات الدولية وازاي توسع لنفسها في الأسواق الخارجية مع الاعتماد على الذات والنفس في التصنيع وتوطين الصناعة وهي الفريضة اللي كانت غايبة عن كل الحكومات اللي مسكت البلد قبل كده.
