محافظ البنك المركزي في مهمة صعبة مع الدولار

بمنطق يا قاتل يا مقتول.. محافظ البنك المركزي المصري حسن عبدالله داخل نزال مع هيمنة الدولار.

نزال المحور الأساسي فيه هو الجنيه المصري واللي بيسعى بكل السبل أنه يرفع من قيمته

ثقة القيادة السياسية في حسن عبدالله محافظ البنك المركزي كبيرة.. ودا ظهر في قرار التجديد له من أسابيع لمدة سنة.

محافظ البنك المركزي أول ما جه قال في المؤتمر الاقتصادي اللي تم عقده من شهور أنه ناوي يعمل مؤشر للجنيه.. واللي بيه هايخلص على هيمنة الدولار.. وكمان أكد أنه ناوي يتبع سياسة إصلاح مالي ونقدي شامل.

الحلول اللي بيحاول ينفذها محافظ البنك المركزي دايما خارج الصندوق.. واللي بتعتمد على زيادة مصادر السيولة الدولارية بعيدا عن المصادر التقليدية.

على رأسها برنامج الطروحات الحكومية اللى الحكومة شغالة عليه بالتعاون مع البنك المركزي.. دا غير سعيه المستمر  لزيادة عوائد السياحة ودعم القطاع وتذليل اى عقبات.

وماننساش دوره في دعم الصناعة ودا من خلال التيسيير على المصنعين للوصول  ل حلم ال 100 مليار دولار صادرات.

النزال مع الدولار مستمر.. واللي ناوي محافظ البنك المركزي أنه يواجهه من خلال مشروع مؤشر الجنيه.

محافظ البنك المركزي قال طالما مصر اقتصادها متنوع وبيعتمد على اكثر من عملة لية بقى نفضل رابطين عملتنا بالدولار الامريكي.

وعلشان كدا مؤشر الجنيه اللي قرب تنفيذه هدفه أنه يخلي عملتنا مش مربوطة بالدولار الأمريكي بس.. هايكون الموضوع متعلق بعملات تانية.

النزال مستمر لكنه محتاج وقت ومجهود وأفكار دايما خارج الصندوق.