لو عاوز تعرف أهمية الانضمام لبريكس.. اعرف الجزائريين عملوا إيه بعد القرار

من يوم الخميس ومفيش كلام في مصر الا عن بريكس وانضمام مصر للتجمع العالمي الكبير.. ناس شايفة ان ده حدث مهم هيقلب الموازين وهيغير قواعد اللعب وهيساعد مصر على عبور أزمة نقص العملة.. وناس تانية بتحاول بكل الطرق تقلل من اللى حصل ومش شايفة انه حدث يستحق الاحتفاء أصلا.. بس بعيد عن دول ودول يا ترى انضمام مصر لبريكس هيعودوا علينا بفايدة ولا لأ ؟ ولو هو حدث عادي ليه اخواتنا في الجزاير قالبين الدنيا على الرئيس والحكومة هناك بسبب رفض انضمامهم للتجمع؟
 
في آخر 48 ساعة الدنيا حرفيا مقلوبة في الجزاير الشقيقة وفيه ثورة غضب كبيرة على مواقع التواصل الاجتماعي ضد الرئيس الجزائري بعد رفض طلب الجزائر بالانضمام لتجمع بريكس والاعلان عن قبول عضوية 6 دول جديدة هي مصر السعودية والامارات وايران والأرجنتين واثيوبيا، خصوا ان الرئيس الجزائري عبدالمجيد تبون كان حاطط أمال عريضة على انصمام بلاده لبريكس وكان بيعول على كده لإنقاذ الاقتصاد الجزائري اللى بيعانى بشدة في اخر سنتنين.
وشكّل عدم وجود الجزائر في قائمة الدول الجديدة المنضمة لمجموعة "بريكس" مفاجأة غير متوقعة وصدمة كبيرة للجزائريين ، خصوصا أن الرئيس الجزائري عبد المجيد تبون، أكد في أكتر من لقاء صحفي  أن "سنة 2023 هتتوج بانضمام بلاده للمنظمة".
وهاجم كتير من الجزائريين الرئيس والحكومة على فشلهم في اقناع أعضاء بريكس بملف الجزائر المقدم لنيل عضوية التجمع في الوقت اللى تم فيه قبول دولة زي اثيوبيا وأشاد الجزائريين بالحكومة المصرية وبالرئيس عبدالفتاح السيسي اللى قدروا ينولوا ثقة دول بريكس بالاجماع عشان مصر تكون مؤهلة للدخول مع الكبار في واحد من أهم التجماعات العالمية سواء على المستوى السياسي أو الاقتصادي.
ورغم حداثة عهد تكتل بريكس وقلة عدد أعضاء التكتل مقارنة بنظرائه من التكتلات الاقتصادية زي الاتحاد الأوروبي والآسيان، لكن بريكس أصبح النهاردة واحد من أهم التكتلات الاقتصادية في العالم؛ نظرًا للثقل الاقتصادي لدوله في ظل ما تتمتع به من إمكانات بشرية وصناعية وزراعية، وده بيخلى قرارات التجمع محط اهتمام وتأثير عالمي كبير
وبيشكل مجموع الناتج المحلي الإجمالي للدول الأعضاء في البريكس حوالي 25.9 تريليون دولار خلال عام 2022 بما نسبته 25.6% من الناتج المحلي الإجمالي العالمي البالغ نحو 101 تريليون دولار في عام 2022، وبتُعَد دول بريكس من الدول اللي شهدت معدلات نمو اقتصادي سريعة؛ وده خلاها من أكبر الاقتصادات العالمية زي الصين الاقتصاد التاني الأكبر عالميًّا بعد الولايات المتحدة الأمريكية.
وبجانب اتساع المساحة الجغرافية لدول بريكس اللي بتشكل مجتمعه حوالى 26% من مساحة العالم، بتمتلك كمان حوالى 40.9% من إجمالي تعداد سكان العالم بإجمالي 3.25 مليار نسمة من الإجمالي العالمي البالغ نحو 7.95 مليار نسمة خلال عام 2022، وده بيخليها سوق عالمي ضخم من حيث قوة العمل والإنتاج وكمان التوزيع والاستهلاك.
ومفيش شك أن استهداف بريكس تقليل التعاملات البينية بالدولار الأمريكي هيخفف من الضغط على النقد الأجنبي في مصر اللي بيمثل الدولار الحصة الكبرى منه، وده هيصب في صالح تحسين عدد من المؤشرات الاقتصادية المحلية، بالإضافة كمان الى أن وجود مصر كدولة عضو ببنك التنمية التابع لتكتل البريكس هيمنحها فرص أكبر للحصول على تمويلات ميسرة لمشروعاتها التنموية.