مفاجأة بوتين غير المتوقعة عن الدولار.. وماذا قال عن التعاون مع مصر؟
فى الساعات القليلة اللى فاتت الدنيا حرفيا مقلوبة فى العالم كله بعد قرار تجمع بريكس بضم مصر ومعاها 5 دول تانيين للتجمع اعتبارا من يناير 2024.. وكل الدول دلوقتى قاعدة تدرس وتشوف تأثير قرارات بريكس على مستقبلها الاقتصاد وعلى مستقبل الاقتصاد العالمي بشكل عام.. واللى زود من الاهتمام العالمي بقرار بريكس التصريحات المهمة والقوية اللى قالها الرئيس الروسي فلاديمير بوتين عن الدولار وعن التعاون الضخم مع مصر مستقبلا فى أكبر مشروع فى تاريخ مصر.. فيا ترى ايه اللى بيحصل فى الكواليس بالظبط؟ وايه اللى قاله بوتين عن الغاء التعامل بالعملة الأمريكية؟ وازاى مصر هتستفيد من الانضمام لبريكس اللى بتسيطر على تلت الاقتصاد وحركة التجارة فى العالم؟
بعد ساعات قليلة من انضمام مصر رسميا لتجمع بريكس الرئيس الروسي فلاديمير بوتين اتكلم عن مستقبل التجمع وعن الخطوات اللى هياخدها بريكس الفترة الجاية وقال ان فكرة التخلى عن الدولار لا رجعة فيها وان بريكس شغالة على استحداث عملة عالمية بديلة للدولار سواء فى التعامل التجاري او حتى فى الاحتياطيات النقدية فى البنوك المركزية.
بوتين قال ان فيه جهود كبيرة بتُبذل فى الفترة الأخيرة لتطوير آليات فعّالة للتسويات المتبادلة والرقابة النقدية والمالية وبناءً عليه حصة الدولار الأمريكي في عمليات الاستيراد والتصدير ضمن مجموعة البريكس هتبدأ تتراجع بشكل ملحوظ السنسن الجاية وقال انها على المدى القريب هتنخفض بحوالى 30% من حجم التعاملات.
كلام الرئيس الروسي بيفتح الباب قدام إمكانية الاعتماد على العُملات المحلية خلال معاملات دول أعضاء مجموعة "بريكس" والتخلى رويدا رويدا عن الدولار اللى فضل لسنين طويل مهيمن ومسيطر على التعاملات التجارية فى العالم كله وتحديدا من سبعينيات القرن الماضي من وقت ما تم اعتماد نظام البترودولار اللى ربط تسعير النفط بالعملة الأمريكية.
ولأهمية انضمام مصر لبريكس وتأثير ده القوي على اقتصادها الرئيس السيسي طلع بيان أشاد فيه بقرار التجمع بضم مصر وقال انه بيثمن إعلان "بريكس" عن دعوة مصر للانضمام لعضويته اعتبارًا من يناير 2024، وان مصر بتعتز بثقة دول التجمع اللى بتربطها بيهم علاقات وثيقة، وبتتطلع للتعاون والتنسيق معاهم الفترة الجاية، وكمان مع الدول المدعوة للانضمام لتحقيق أهداف التجمع نحو تدعيم التعاون الاقتصادي ، والعمل على إعلاء صوت دول الجنوب إزاء مختلف القضايا والتحديات التنموية اللي بتواجهها، بشكل يدعم حقوق ومصالح الدول النامية.
نرجع تانى لكلام الرئيس الروسي اللى اتكلم عن مشروع الضبعة النووية في مصر والتعاون معاها في مجال الطاقة النووية.
بوتين قال إن روسيا بتتعاون مع الدول الأفريقية بشكل كبير في مجال الطاقة النووية وفي المجالات التانية وقال ان من بين اكبر المشروعات اللى موسكو شغالة عليها فى افريقيا التعاون مع مصر في بناء مفاعلات الضبعة النووية لتوفير الكهرباء وباقي الأغراض السلمية من خلال شركة "روس آتوم"المشرفة على المشروع.
