أخيرا نهاية السنة الكبيسة.. مصر تودع الغلاء والدولار
المصريين عاشوا أيام صعبة على مدار السنيتن اللي فاتوا وزادت الأوضاع صعوبة في 2023 واللي بتعتبر سنة كبيسة عاشها المصريين.. ليه الأيام الصعبة عدت واللي جاي كله خير وانطلاق واستقرار وإيه اللي هيحصل في الأيام الباقية من السنة العصيبة
لو تابعنا محنى الأزمة الاقتصادية في مصر بعد اندلاع الصراع الروسي الاوكراني هنلاقي إنه خلال الـ6 أشهر الأخيرة وصلت الذروة مع ارتفاع التضخم وغلاء المعيشة وتصاعد أزمة الدولار وتوحش السوق السودا، وخلال الشهور اللي فاتت مصر شافت اللي مشفتهوش من سنين طويلة ولكن حكومة مدبولي وشهادة للتاريخ ورغم الصعوبات قدرت إنها تتعامل مع الأزمات بحكمة وسرعة وضمنت عدم خروج الأمور عن السيطرة ..أيوا حضرتك كان ممكن الأمور تاخد اتجاه خطير جدا لو الدولة اتهاونت في سوق صرف العملات وسابت الدولار يوصل 50 جنيه وكان هيوصل لولا الاجراءات الكتيرة والتحركات السريعة ولو عدى الدولار حاجز الخمسين أو الـ60 كانت الأمور بقت مستحيلة على المواطن.
خلونا في اللي جاي ونتكلم شوية في الشهور الجاية مع بداية 2024 واللي هتكون بداية الهدوء والاستقرار واسترداد الأنفاس ومتوقع فيها إن الأوضاع الاقتصادية تتحسن ودا كلام الحكومة والتقارير الدولية ومؤشرات الاقتصاد ولو جينا للأسباب هنلاقيها كتير أولها انتهاء حدة أزمة نقص الدولار بعد تنفيذ برنامج الحكومة في بيع الشركات ونجاحها في تقليص فاتورة الاستيراد مقابل تعظيم وتوطين الصناعة المحلية بالاضافة إلى الارتفاع المستمر في تدفقات الدولار للدولة من كل القطاعات.
خبراء الاقتصاد بيعلقوا أمال كبيرة على قطاع مهم إنه يقود الدولة المصرية ناحية الاستقرار والانطلاق الاقتصادي وهو قطاع الاستثمارات المباشرة واللي رشحوا مصر إنها تكون المقصد الأول في افريقيا والشرق الأوسط بسبب تعدد الفرص وارتفاع الأرباح وسرعة نمو المشروعات خاصة القطاع العقاري والصناعي واللي مصر حققت فيه طفرة وبدأت تصدر العقارات وكلنا شفنا إزاي العلمين الجديدة بقت حديث العالم والاستثمارات اللي دخلت الساحل الشمالي واللي لسه هتيجي وإعلان كيانات عقارية عربية وعالمية عملاقة استثمار مليارات الدولارات في مشروعات عقارية وفندقية وضيافة في المنطقة.
وحسب البيانات الرسمية الحديثة مصر جذبت صافي استثمارات أجنبية مباشرة سجلت 67 مليار دولار خلال الـ10 سنين الأخيرة، ووسجلت قيمة صافي الاستثمار الأجنبي المباشر 6 مليار دولار في النص الأول من العام المالي 2022 - 2023 مقابل 3.3 مليار دولار خلال الفترة نفسها من العام المالي 2021 - 2022 .
وتصدرت السعودية قائمة أعلى 10 دول استثماراً في مصر خلال النصف الأول من العام المالي 2022 - 2023، حيث بلغت قيمة استثماراتها في السوق المصرية نحو 2.1 مليار دولار، يليها في المرتبة التانية دولة الإمارات باستثمارات 1.5 مليار دولار، وحسب توقعات أهل الاقتصاد مصر بنتظر قفزة كبيرة في الاستثمار المباشر في كل قطاعات الدولة وزي ماقلنا في مقدمتها القطاع العقاري والسياحي والصناعي والترفيهي والنقل والمواني واللوجستيات زالتعدين والزراعة وفرص ملهاش أول من أخر.
