أخطر 48 ساعة.. مصر تنتظر أهم قرار في 2023
يا ترى ايه اللى هيحصل خلال الـ 48 ساعة الجاية ؟ وليه اليومين الجايين هما الأخطر السنة دي ؟ وايه القرار اللى مصر مستنياه ولو حصل هيقلب الموازين في أزمة الدولار؟ وهل ممكن ميكنش فيه تعويم جديد للعملة المصرية؟ وايه موقف صندوق النقد الدولي؟
بعد بكره رؤساء الدول والحكومات لمجموعة «بريكس»، اللي بتضم البرازيل وروسيا والهند والصين وجنوب أفريقيا هيجتمعو في القمة ال 15 في جنوب افريقيا .. وعشان تعرفوا أهمية اجتماع دول البريكس وايه اللى ممكن يعملوا هنقولكم النهاردة شوية ارقام هتسمعوها يمكن لأول مرة وهتعرفوا مفاجآت جديدة محدش كتير يعرفها
وخلونا نسأل الأول السؤال المهم.. هو ليه اجتماع بريكس السنة دي مهم وخطير في نفس الوقت؟
الحقيقة فيه سببين .. الأول ان بريكس هتناقش لأول مرة فتح عضويتها لأكتر من دولة يعنى الدول الأعضاء مش هيكونوا ال 5 دول الموجودة دلوقتى بس وده هيزود من قوة وانتشار بريكس عالميا وهيزيد من حجم مساهمته في الناتج العالمي .. والاجتماع هيناقش كمان استخدام العملات المحلية في التجارة بين الدول الأعضاء يعنى كل الدول اللى هتنضم للتجمع ممكن تعمل اتفاقيات لمبادلة العملات وتخلى التعامل التجارى بينها وبين بعضها بالعملات المحلية وتستغني تماما عن الدولار
وأخطر موضوع هيناقشه اجتماع بريكس هو تشكيل لجنة فنية لبدء النظر في إصدار عملة مشتركة محتملة هتكةن بديلة للدولار ومن المتوقع ان العملة دي هيكون ليها حصة كبيرة من الاحتياطي النقدي في الدول الأعضاء وده تهديد واضح لمستقبل العملة الأمريكية.
كمان الاجتماع المرة دي بيكتسب أهميته انه أول اجتماع حضورى لبريكس من وقت ظهور كورونا ولحد دلوقتى لأن الاجتماعات في الفترة الأخيرة كانت بتتم أون لاين فقط.
وتم توجيه دعوات ل 67 رئيس وزعيم لحضور القمة ومنهم قادة من أفريقيا وأميركا اللاتينية وآسيا ومنطقة البحر الكاريبي.
حد هيسأل ويقول وهو ايه أصلا تجمع بريكس ده ؟ وايه وضعه في الاقتصاد العالمي؟
دول تجمع «بريكس» من أهم 5 اقتصادات ناشئة في العالم.. وظهر مصطلح «بريك» في عام 2001 وفي عام 2010، تم توسيعه بدعوة من الصين، ليشمل جنوب أفريقيا ليصبح «بريكس».. وبتمثل مجموعة «بريكس» 42 % من سكان العالم، وأكثر من 25 % من الناتج المحلي الإجمالي العالمي، و16 % من التجارة العالمية، وفق أرقام مؤتمر الأمم المتحدة للتجارة والتنمية (الأونكتاد).
وفى اخر 10 سنين أصبحت دول البريكس منافس اقتصادي قوي لمجموعة السبع وبتشمل مبادراتها إنشاء مصرف عالمي بديل لصندوق النقد الدولي.
طب مصر هتستفاد ايه من الانضمام لتجمع بريكس؟
الحقيقة انضمام مصر لتجمع بريكس ليه فوايد كبيرة جدا لمصر لان خد بالك انت هنا بتتكلم عت تجمع اقتصادي وسياسي عملاق هيكونليه تاثير قوى على مسرح التجارة العالمية السنين الجاية ولما تنضم ليه هتقدر تعمل اتفاقيات مبادلة عملات وتسدد فاتورة استيرادك بعملات تانية غير الدولار وده هيرفع ضغط كبير عن الاحتياطي النقدي من العملة الأجنبية في وقت انت أصلا بتعانىفيه من نقص واضح في العملة الأمريكية .. كمان هتقدر تنوع مصادر استيرادك وتشترى سلع بأسعار أرخص وأسواق متنوعة
وكمان تجمع بريكس انشأ مؤخرا بنك التنمية الجديد اللى هيكون بديل لصندوق النقد الدولى وهيقرض الدول لكن بشروط مش مجحفة زي ما بيعمل صندوق النقد دلوقتي يعمى من الاخر مصر هتحقق مكاسب قوية جدا من الانضمام لبريكس
