العالم السري لبيع السجاير فى مصر.. سوق سودا لمزاج المصريين
لسه أزمة ارتفاع اسعار السجاير بشكل جنوني مستمرة ولسه الحكومة بتحاول تدور على حلول لأكتر مشكلة بتعكنن مزاج المصريين واتسببت حالة عدم الاستقرار اللي شهدتها الأسواق خلال آخر شهرين في ظهور بوابة خلفية لأسعار السجائر السرية والدخان ومنتجاته ليرتفع سعر العلبة الواحدة ما بين 20 و 25 جنيه فى بعض المناطق والمدن المصرية.. فيا ترى ايه اللى بيحصل بالظبط ؟ زفين الحكومة من الأزمة الكبيرة دي؟ وهل ارتفاع اسعار السجاير ليه علاقة بأزمة نقص العملة الأجنبية اللى بتعاني منها مصر؟
وفقا لبيانات أسعار السجائر المحلية والأجنبية في مصر والصادرة عن شركة فيليب موريس اللي تضمنت أسعار منتجاتها من التبغ ومنها ميريت بأنواعها 64 جنيه، ومارلبورو الحمراء والجولد بـ 59 جنيه ومارلبورو كرافتيد بـ 49 جنيها وإل إم الأحمر أو الأزرق والسيلفر بـ42 جنيه، إلا أن الاسعار غير الرسمية زادت بقيمة 25 جنيه في المحلات وأكشاك بيع السجائر.
وو صلت أسعار السجائر المحلية واللي بتنتجها الشركة الشرقية للدخان إيسترن كومباني،و منها كليوباترا كوين سوفت أو بوكس أو مونديال أحمر أو أزرق 24 جنيه بالإضافة لمونديال لايت بنفس السعر وكليوباترا بلاك ليبول بـ24 جنيه، وبوسطن بنفس السعر وفايسوري بـ35 جنيه، لكن المنتجات دي كلها زاد سعرها في الأكشاك والمحلات بمعدل 5 و7 جنيه عن السعر الرسمي وفى اماكن كتير زاد بأكتر من كده.
وفي تصريحات سابقة لرئيس الوزراء الدكتور مصطفي مدبولي لاحتواء أزمة ارتفاع أسعار السجائر السرية في الاسواق أعطى تعليمات للشركة الشرقية للدخان "إيسترن كومباني" التابعة للحكومة بالعمل علي توفير الخامات لزيادة الطاقة الإنتاجية في السوق لتغطية الطلب المحلي المتزايد.
وفي تصريحات كمان لرئيس الشركة الشرقية للدخان "إيسترن كومباني" قال إن الشركة خسرت حوالي مليار جنيه جراء ظهور أسعار السجائر السرية للدخان، والفلوس دي دخلت خزاين وجيوب التجار الجشعين.
وقال إن شركته بتستحوذ علي تلت أرباع سوق السجاير في مصر، وتم موافقة مجلس الوزراء علي زيادة الاعتمادات المستندية لشراء الخامات من الخارج وزيادة الإنتاج اليومي بواقع 150 مليون سيجارة منتجة يوميا.
وأرجع رئيس شعبة الدخان، إبراهيم الإمبابي؛ أسباب زيادة أسعار السجائر السرية في مصر إلي جشع التجار وغياب الدور الرقابي الحقيقي للجهات المعنية، وقال ان ده خلا فيه فجوة للتلاعب في تسعيرة السجاير المعلنة من الشركات.
