درس البنك المركزي المصري لبنوك أوروبا

في مصر عندنا عقدة الخواجة واللي ظهرت عندنا في السبعينات مع سياسة الانفتاح والاستيراد الشره وافتكرنا إن كل اللي بيعمله الغرب صح ولازم نقلده.. ازاي دا كلام مش منطقي وغير صحيح وإزاي القطاع المصرفي المصري اتفوق على الأوربي وإيه الفضيحة اللي بتحصل في بريطانيا
 

 النظام المصرفي والبنوك عنده ميزة مش موجودة في أي نظام مصرفي في أوروبا وهو إنه نظام بيعتمد على الادخار بشكل أساسي يعني بيتستثمر مدخرات العملاء في مشروعات تجيب إيرادات لكن في أوروبا النظام المصرفي قائم على الإقراض المفرط والفايدة العالية وكانت النتيجة زي اللي حصل في بريطانيا اليومين اللي عدو وحصل قبل كده في أمريكا.
اللي حصل في بنوك إنجلترا إنها اقرضت الاف البريطانيين لشراء منازل وسيارات وقروض شخصية كبيرة وفجأة مع الأزمة الاقتصادية وارتفاع الفايدة المواطنين مش معاهم فلوس يدفعوا الأقساط ووقعت البنوك في أزمة حقيقية وكان التصرف إنها سحبت وصادرت واتحفظت على مملتكات البريطانيين وطردت الاف منهم من بيوتهم عشان البنوك تضمن جزء من فلوسها.
ونتيجة  الظروف المعيشية الصعبة في بريطانيا العظمي والغنية المواطنين عملوا كارثة للبنوك وهي إن جزء كبير من العملاء سحبوا الوديع بتاعتهم والنتيجة أكبر أربع بنوك في المملكة المتحدة خسرت أو فقدت حوالي 80 مليار جنيه إسترليني في سنة واحدة بس يعني في 12 شهر ودا سبب أزمة كبيرة وخطيرة في اهم دولة أوروبية، والخبراء فسروا ظاهرة سحب الودايع لأن الأسر البريطانية بتكافح ارتفاع تكاليف المعيشة وزيادة الأسعار.
وغير أزمة هروب الودايع البنوك البريطانية بتواجه أزمة كبيرة تاني وهي أزمة الرهن العقاري بعد فشل أصحاب المنازل سداد أقساط القروض ودي هيكون ليها تبعات خطيرة على صناعة العقار في بريطانيا.
خلو بالكم إحنا بنتكلم عن ظروف اقتصادية صعبة في دولة عظمى اقتصاديا لدرجة ان الناس مش عارفة تعيش رغم مستوى المعيشة الكبير والعالي وغلاء الأسعار ودي نتايج وبيانات البنوك البريطانية هي اللي أعلنتها يعني مش بنبالغ ومقارنة بالدخول والمرتبات في مصر واللي الأزمة عندنا موصلتش للشكل دا والأسعار مرفعتش بشكل تعجز الناس وفي نفس الوقت اللي حصل في بريطانيا بيقول ان النظام المصرفي عندنا متنوع وقوي وبعتمد بشكل أساسي على الادخار والاستثمار.