20 مليار جنيه في عين العدو..أرباح العاصمة الإدارية تصعق الإخوان والمشككين
فاكرين لما الدولة أعلنت عن مشروع العاصمة الإدارية في الظهير الصحراوي لمحافظة القاهرة وطلعت ساعتها أصوات تعارض المشروع وقالوا عليه ملهوش جدوى ، وفاكرين لما عناصر الإخوان ومواقعهم الاخبارية وصفحات التواصل الاجتماعي شنو حملة مسعورة على المشروع وقالوا السيسي بيرمي فلوس المصريين في الصحرا، وراحت فلوسكم يامصريين وإيه لازمتها العاصمة الادارية وكلام كتير.. النهاردة الارقام بترد على الاخوان وعلى المشككين وبتأكد رؤية القيادة المصرية بعد ما المشروع بقى واقع.. ياترى إيه حصل في العاصمة الإدارية وايه حكاية الارقام والأرباح القياسية والمليارات اللي دخلت خزينة الدولة في 2022
ما بين مشهد بداية حفر الطرق في العاصمة الإدارية وبين مشهد الزجام في شوارعها الواسعة وميادينها اللي تداولته وسائل الإعلام سنين قليلة جدا تتعد على الأصابع قدرت فيه الدولة تخلق مجتمع كامل وعاصمة بمواصفات عالمية، وكلنا شفنا الاف الموظفين اللي راحوا يشتغلو من العاصمة بعد نقل الوزارات في الحي الحكومي ونبضت الحياة في العاصمة الجديدة واللي أصبحت فخر للتنمية العمرانية المصرية.,
وللعلم مشروع العاصمة الدولة مدفعتش فيه جنيه من ميزانيتها وبالعكس الدولة كسبت وعملت المشروع من أرباح الاراضي اللي قفزت بشكل خيالي في العاصمة الجديدة، وبقت الشركات العالمية والمصرية بتتسابق عشان تشتري في أرض المستقبل والصحرا بقت جنة والرمل بقاله سعر والشبر في العاصمة ليه تمنه، دي الفكر اللي كانت بتفكر فيه الدولة المصرية الجديدة.
الجديد إن مشروع العاصمة مش مجرد نقلة عمرانية متوقع تستوعب 6 مليون مصري في المستقبل بعد اكتمال كل المراحل، لكن بقي يحقق ارباح ضخمة كمان ورغم إن المرحلة الأولى للمشروع لسه مخصلتش ودا اللي أعلنته شركة العاصمة الإدارية للتنمية العمرانية، واللي كشفت بياناتها تحقيق نمو في إجمالي الأرباح بنسبة 23% لتصل الأرباح الإجمالية للشركة إلى 19.8 مليار جنيه قبل خصم الضرائب، ودا خلال سنة 2022. وبالرقم ده تشكل الأرباح نحو 100% من رأس المال المصدر للشركة تقريباً.
وحسب بيان شركة العاصمة كشفت الشركة، إنها سددت 3.7 مليار جنيه ضرائب خلال الفترة المذكور مقابل 657 مليون جنيه عن 2021 بزيادة قدرها 3 مليارات جنيه، وتم سداد 1.4 مليار جنيه لصالح ضريبة القيمة المضافة وكذلك 340 مليون جنيه ضريبة أرباح ليصبح إجمالي ما تم سداده من ضرائب 5.5 مليار جنيه، وقالت البيانات إن نصيب السهم من الأرباح عن العام المالي 2022 بلغ 78.7 جنيه مع ارتفاع قيمة الأصول عن العام المالي 2022 لتكون 255 مليار بدلاً من 104 مليارات عن العام المالي السابق.
يعني يامصريين المرحلة الأولى من العاصمة لسه قيد الإنشاء وفيها مشروعات لسه مخلصتش وحقق أرباح 20 مليار جنيه تقريبا ودخلت خزينة الدولة حوالي 4 مليار جنيه، ودا المشروع اللي كتير هجموه جوه وبره مصر وشككت فيه جماعات الفتنة والحقد، دلوقتي بقي مشروع بيحيب مليارات كل سنة ومتوقع طبعا إن السنين اللي جاية الارباح هتضاعف كل ما تقدم العمل في المشروع، وعلى فكرة وعشان تعرف قد إيه المشروع ضخم المرحلة الأولى من العاصمة تساوي كل مساحة مدينة القاهرة الجديدة بكل تجمعاتها.
وعشان تعرف إزاي مشروع العاصمة الإدارية هيكون مشروع المليارات رئيس مجلس الإدارة والعضو المنتدب لشركة العاصمة الإدارية الجديدة في مصر، خالد عباس، كشف في فبراير اللي فات عن تخصيص 3 مليار جنيه لتأسيس من 4 أو 5 شركات جديدة خلال 2023، بالشراكة مع جهات وأطراف مختلفة وقال إن حجم الاستثمارات في العاصمة الإدارية حالياً تخطى حاجز التريليون جنيه.
