سر هدوء الذهب والأسواق ..مستنية الحدث الأعظم

من مدة طويلة وسوق الدهب هادي والأسعار ما بين الانخفاض والاستقرار.. ياترى ايه اللي حصل وهل الناس بطلت تشتري دهب وايه الحدث الكبير اللي مستنية سوق الصاغة في مصر الأيام الجايه.

الدهب مستقر من حوالي 3 شهور ودي مدة طويلة جدا في ظل أزمة عملة وغلاء في الأسواق ودا إنجاز في حد ذاته لكن ايه سر الاستقرار والهبوط احيانا في الأسعار.. هاني ميلاد، رئيس شعبة الدهب طلع وقال في تصريحات تلفزيونية، إن سعر الدهب بيعيش حالة من التوازن، بمعنى إنه بيرتفع وينزل في حدود 5 جنيه بس، ومن 3 شهور محصلش قفزات أو انخفاضات كبيرة، كمان لاول مره الأسعار الحالية بتمثل أو تقرب من السعر العادل والأمثل للشراء.
طيب ليه الدهب مستقر .. الإجابة باختصار عشان فيه حالة استقرار في كل العوامل اللي بتأثر على أسعار الدهب زي سوق الصرف والمعروض وحالة الطلب وابتعاد شبح التعويم أو تخفيض الجنيه والتعويم عشان نبقى عارفين هو البعبع اللي ييهز سوق الدهب لأن قيمة الجنيه بتنزل وقسمة المدخرات يتنزل عشان كده الناس بتاخد مدخراتها وتحويشة العمر وتجري اول حاجة على الصاغة ويشتروا دهب سبايك وجنيهات دهب ومشغولات عشان تحافظ على قيمة فلوسها ومدخراتها لأن الدهب استثمار مضمون على المدي المتوسط والبعيد ولأن موضوع التعويم تتحسن إنه مش وقته دلوقتي دا هينعكس على استقرار سوق الدهب.

كمان سوق المعدن الأصفر مستقر عالميا ووسط اتجاه بنوك مركزية عالمية لبيع جزء من مخزون الدهب عندها مع انخفاض الاسعار ودا انعكس على حجم المعروض وارتفاعه في معظم دول العالم وفي نفس الوقت الطلب قل على الدهب في مصر بسبب استقرار الأوضاع الاقتصادية وبسبب الاتجاه للاستثمار في مجالات تانية زي العقارات وشهادات الادخار اللي البنوك طرحتها بفوائد عالية.
طيب الدهب هيفضل مستقر لغاية امتى.. زي ما قلنا طالما الأوضاع مستقرة في سوق الصرف والعملات وسعر الجنيه هيفضل مستقر لكن ممكن الأوضاع تتقلب مرة واحدة في أسواق الدهب لو المركزي أعلن في وقت من الأوقات تحرير جديد لسعر الجنيه أو التعويم ودا هيرفع أسعار الدهب وقتها لارتفاع الطلب في نفس الوقت الدهب مرتبط بسعر الدولار في السوق السودا والشوق الرسمية فلو حصل ارتفاع مفاجئ بردو دا هينعكس على سوق الدهب لأن الناس بتجري على المعدن الآمن مع اي أخبار سلبية أو ظهور أزمة جديدة عشان تأمن مدخراتها وغير كده يبقي السوق في أمان.