تحرك جديد من صندوق النقد بخصوص مصر

يا ترى امتى صندوق النقد هيراجع برنامج الإصلاح الاقتصادي بتاع مصر؟ وهل بعثة الصندوق ممكن تزور القاهرة قريب؟ وايه المتوقع يحصل في الملف ده ؟ وامتى ممكن مصر تصرف الشريحة التانية من قرض ال 3 مليار دولار اللى اتفقت عليه مع الصندوق في شهر ديسمبر اللى فات؟ 
 
لما مصر أعلنت في نهاية 2022 عن اتفاقها مع صندوق النقد على قرض جديد كان من ضمن الاشتراطات بتاعت الصندوق انه هيعمل مراجعة لبرنامج الاصح اللى بتنفذه الحكومة كل 3 شهور وبناء على المراجعة دي هيحدد مصير شرائح القرض اللى مصر استلمت الشريحة الأولى منه بقيمة 350 مليون جنيه .

ووفقا للاتفاق ده فكان المفروض المراجعة الأولى للبرنامج تحصل في شهر مارس اللى فات لكن ده محصلش واتقال ان فيه خلافات بين مصر والصندوق حوالين بعض البنود ومنها طبعا سعر الصرف وإصرار الصندوق على تخفيض قيمة الجنيه من جديد 
ولحد الحظة اللى احنا فيها دلوقتي محدش عارف بعثة الصندوق ممكن تزور القاهرة امتى وممكن تنتهى من المراجعة الأولى والتانية في وقت أد ايه ؟
ومن ساعات خرج تقرير من بنك الاستثمار مورجان ستانلى أتوقع ان مصر هتتمكن من اجتياز مراجعات البرنامج الاقتصادي خلال شهر سبتمبر او أكتوبر الجاي على اقصى تقدير. 
وكشف بنك الاستثمار الأمريكي أن التقدم الأخير اللي حققته الحكومة المصرية، على صعيد مبيعات الأصول والتحسن في ميزان المدفوعات، بيشيروا لانحسار محتمل لنقص السيولة بالعملة الأجنبية.
وعلى الرغم من الإجراءات الأخيرة اللي نفذتها مصر بشأن برنامج الطروحات، أكد التقرير أن فيه حاجة للمزيد من خفض قيمة العملة لضمان استمرار استعادة التوازن على الصعيد الخارجي، في ظل انتظار الاقتصاد مراجعات صندوق النقد الدولي.

مورجان ستانلى قال ان  مصر بحاجة لإتمام طروحات جديدة بقيمة 4.8 مليار دولار من دلوقتى ولحد يونيو 2024، لتغطية الفجوة التمويلية المقدرة بنحو 18 مليار دولار، وفق المستهدف في برنامجها مع الصندوق.
وأوضح أن انخفاض عجز الحساب الجاري كان مُحصلة لزيادة الإيرادات من الخدمات وكبح الواردات، اللي أدى لنقص في المعروض، وأضر بالنمو وخلق ضغوط تضخمية كبيرة.