مشروع مصري سعودي هيغير قواعد اللعب.. استثمارات بمليارات الدولارات

 
مصر والسعودية بينهم تعاون كبير جدا في القطاع الاقتصادي ودعم المملكة لمصر مش متوقف على المنح والقروض اللى دعمت بيها الاحتياطي النقدي في عز أزمة مصر وفى أيام صعبة عاشتها القاهرة بداية من 2013 ولحد دلوقتي.. وصندوق الاستثمارات العامة في السعودية بيولي مصر أهمية كبيرة جدا ومخصص جزء كبير من ميزانيته للاستثمار في الفرص المتاحة عندنا.
وفى الزيارات المتبادلة سواء من الملك سلمان بن عبدالعزيز خادم الحرمين الشريفين وولي عهد الأمير محمد بن سلمان والرئيس عبدالفتاح السيسي دايما بيكون فيه حوار عن أهمية زيادة الاستثمارات بين البلدين.. وفى الساعات الأخيرة تم الكشف عن تعاون كبير هيتم بين القاهرة والرياض هيعمل قلبان وهيغير قواعد اللعب.. فيا ترى إيه المشروعات اللي هتعملها مصر والسعودية في الأيام الجاية ؟ ومصر هتستفاد منها ايه؟
 
في الساعات الأخيرة حصل اجتماع مهم جدا بين وزير البترول المصري طارق الملا ووزير الصناعة والثروة المعدنية بالمملكة العربية السعودية بندر الخٌرَيّف، وفى الاجتماع ده الوزيرين ناقشوا ازاى مصر والسعودية ممكن يزودوا أوجه التعاون في مجال التعدين
وفى اللقاء ده وزير البترول المصري أكد ان قطاع التعدين في مصر بيعد فرصة لمزيد من التعاون والتكامل بين مصر والمملكة وتبادل الخبرات.. خصوصا بعد اللي شهده قطاع التعدين المصري من إصلاحات بتمثل خطوات جيدة للانطلاق بأنشطته
وأكد  الملا  اهتمام الوزارة بتحقيق أعلى قيمة مضافة من الخامات التعدينية من خلال التوسع في تصنيع الخامات اللازمة لمشروعات التعدين. 
ونجحت مصر في جذب انتباه المستثمرين لأنشطة قطاع التعدين بعد التطورات اللي تم إدخالها على القطاع، ومصر بتملك المقومات والخبرات الجيولوجية الكفيلة بتحقيق نتائج مميزة فى مجال التعدين.
وبتستهدف مصر دخول الشركات العالمية فى مجال التعدين والبحث والتنقيب عن الدهب والخامات التعدينية التانية والعمل على القيمة المضافة فى مصر وفيه تعاون كبير مع شركة معادن السعودية وهى من كبرى الشركات العالمية العاملة فى مجال التعدين فى العديد من دول العالم.
وبتستعد مصر حاليا لتوقيع بروتوكول تعاون واتفاق جديد مع شركة معادن للعمل فى مصر فى مجال الاستكشاف والتصنيع للخامات التعدينية، وبتعد مصر من الدول الغنية بالمعادن اللى بتتطلب قدرة خاصة على استخراجها وتصنيعها فى مصر والاستفادة من القيمة المضافة وإتاحة فرص العمل خاصة لأبناء الصعيد.

وأكد وزير الصناعة والثروة المعدنية السعودي خلال اللقاء على وجود فرص للتكامل بين مصر والمملكة فى قطاع التعدين بالاستفادة من التطورات الإيجابية الأخيرة اللي  بيشهدها القطاع فى البلدين.