4.5 تريليون دولار.. مصر تدخلت العالم السحري من البوابة الهندية
الاتصالات وتكنولوجيا المعلومات هي سر العالم اللي جاي ومحور صراعاتته وحروبه الاقتصادية ومنافساته واحتكاراته، عالم جديد وملهوش حدود واستثماراته بالتريليونات كل سنة.. ياترى العالم بيستثمر كام في تكنولوجيا المستقبل ومصر موقفها في العالم الرقمي واللي هيقود العالم وايه حكاية الاتفاقية الأخيرة مع الهند.
من يملك التكنولوجيا يملك كل شيء .. دا لسان حال الاقتصاد العالمي الجديد دلوقتي لان تكنولوجيا المعلومات والرقمنة هي الحاضر دلوقتي مش المستقبل ودا كله بيصب في حاجة أحدث وهي اللي هتكون عنوان ثورة التكنولوجيا فائقة التطور وهي الذكاء الاصطناعي واللي العالم كله هيدور في فلك تكنولوجيا هتكون مسئولة عن كل ما يتعلق بأمور الحياة.. وانت قاعد مكانك هتعمل كل حاجة وهتشوف صوت وصورة واحساس على طريقة تقنية الميتافيرس والآلات هتكون هي المتحكمة في مصير البشر ومن كتر العالم الواسع والمخيف اللي العلماء بدأوا يكتشفوه ظهر إنها تكنولوجيا خطر وفيه رجال اعمال وعلماء ورجال صناعة حذروا من المبالغة في استغلال تقنية الذكاء الصناعي وتكنوولوجيا المعلومات.
في النهاية العلم مش بيوقف عند مدى معين ودي سنة الحياة وعلم الإنسان مالم يعلم واللي بقى يعرفه بقي مخيف يعني تخيل كده تصنع حاجة بإيديك وتبرمجها وفي الاخر تخاف منها ومن رد أفعالها اللي مش مضمون دي تكنولوجيا الذكاء الصناعي انت بتدي للألة برامج وبتسمح ليها تكون ردود أفعال من نفسها يعني كانها تمثال وفجأة بدب فيها الروح .. احنا بنحاول نقربلك شوية الصورة عشان تعرف العالم انت داخل عليه واللي بقى يتعاملوا بيه بره.
وخلينا نأكد إن قطاع الاتصالات وتكنولوجيا المعلومات أصبح أمر حتمي لبناء مجتمعات رقمية واللي مش هيلحق مش هيعرف يعيش وكفابة تعرف إن إجمالى الإنفاق على تكنولوجيا المعلومات فى جميع أنحاء العالم هيوصل 4.5 تريليون دولار بنهاية السنة دي 2022، بزيادة 5٪ عن .2021؛ ولسه الأرقام دي هتضاعف عشان كده مهم قلنا عن التكنولوجيا الجديدة ومدى الاعتماد عليها هيبقي جزء صغير من واقع ومستقبل العالم الافتراضي المخيف دا.
الدكتور عمرو طلعت وزير الاتصالات وتكنولوجيا قال إن بناء مصر الرقمية هو هدف لامفر منه وبيتم تنفيذه بخطة طموحة عشان تلحق ركب الجيل الجديد من التكنولوجيا، وقال إن استتثمار مصر في قطاع المعلومات وصل 23 مليار جنيه في 2022 وهتضاعف لأن الجاي صعب ولازم الدول تكون قده، ومصر والهند وقعوا على اتفاقية من أيام للتعاون في مجال صناعة الاتصالات وتكنوولوجيا المعلومات والهند ليها باع كبير في النوع دا من الاستثمار وأكيد هتحصل طفرة كبيرة في مصر في القطاع التقني والتكنولوجي في الفترة الجاية.
