المشروع المصري اللي المنطقة وامريكا وأوروبا مرعوبة منه
مصر هتكون سابع أغنى دولة في العالم في 2030.. يعني خلال سنين قليلة أي حد هيسمع الكلام ده دلوقتي أكيد مش هيصدق عشان شايف الأزمات اللي فيها البلد وارتفاع الأسعار والدولار لكن الكلام دا اتقال في تقرير دولي نشره الموقع الإخباري البريطاني «lovemoney» وحسب فيه إمكانيات الدول ومعدل تطورها ونموها وقدراتها البشرية والاستثمارية وحجم العمل فيها وفي تقرير تاني طلعه بنك كريدي سويس ونشره موقع "Insider Monkey"، وفيه جت مصر قبل الامارات في الدول الأكثر ثراء وفي المرتبة 32 عالميا بصافي ثروة تزيد على 1.4 تريليون دولار.. بعيد عن رأيك في الكلام ده دلوقتي هنقولك ازاي دا ممكن يتحقق فعلا وازاي مصر هتكون من أغنى دول العالم وهنقولك ايه حكاية مشروع واحد بس بتنفذه مصر وقالب المنطقة والغرب وامريكا ودول في المنطقة مرعوبة منه.
المشروع العملاق اللي هيغير شكل اقتصاد مصر هو تنمية سيناء واللي الدولة بتهدف لتحويله لمشروع ينقل مصر كلها في حتة تانية لأنه مشروع متكامل وايراداته هتكون بمليارات الدولارات كل سنة والدولة صرفت لحد دلوقتي 750 مليار جنيه بالفترة الأخيرة فى تنمية وتعمير سيناء وتنفيذ مشروعات البنية التحتية القوية واللي هتكون أساس لتحويل سيناء لدبي وسنغافورة مع بعض لأنها يعني سيناء هتكون مركز للتجارة الدولية ومركز لتجارة اللوجستيات والموانئ ومركز للصناعات التعدينية ومركز للصناعات التكنولوجية والطاقة والنظيفة ومركز زراعي بمليون فدان مرحلة أولي بخلاف الصناعات اللي هتقوم على النشاط الزراعي وبخلاف السياحة وليلة كبيرة جدا.
الدولة عملت ايه عشان تحول سيناء لمصنع دولارات كبير في المنطقة والعالم... زي ماقلنا بدأت بالبنية الأساسية اللي هي أساس اس تنمية واستثمار وأنشأت مواني عالمية في المنطقة سواء في شرق بورسعيد والسخنة أو في العريش اللي انتهي عمل تقريبا في أهم ميناء في سيناء وطبعا المواني وبسبب قربها من قناة السويس هتبقي منظومة تجارة متكاملة في منطقة واحدة مش موجوده في العالم كله ، ولسه لما تخلص المشروعات في المنطقة الاقتصادية للقناة ودي لوحدها حكاية لأن فيه مجتمع صناعي ضخم جدا بيتنفذ هناك باستثمارات من كل الدنيا وشفنا الرئيس الروسي فلاديمير بوتين اتكلم عنها ازاي في حديثه مع الشيخ محمد بن زايد رئيس الإمارات وجب سيرة المدينة الصناعية الكاملة اللي بتنفذها روسيا في اقتصادية قناة السويس واللي طلب بن زايد إن بلاده تشارك فيها .
ومن بين المشروعات اللي هتحول سينا لغول تجاري هي شبكة السكة الحديد اللي بتتعمل هناك دلوقتي ولاول مرة في تاريخ شبه جزيرة سيناء واللي وظيفتها تربط المواني على البحر المتوسط وسيناء بمناطق الإنتاج والمواقع التعدينية زي مصانع الاسمنت والجبس والحديد والرخام والكوارتز وغيرها كتير ودا هيوفر وقت كبير جدا في نقل البضايع وفي نفس الوقت الوزير كامل الوزير كشف عن مشروع النقل العربي واللي هينقل تجارة الأردن والعراق ودول الخليج من خلال شبكة السكة الحديد والمواني المصرية وهو مشروع خلص بالفعل.
اللي بيحصل في سيناء طبعا عامل رعب لدول كتير في المنطقة لأنه قصة على أحلامها في السيطرة على خطوط التجارة في المنطقة ومنها لأوروبا وامريكا واجهضت مشروعها البديل عن قناة السويس وفي دول كتير تحول سيناء لوحش صناعي ولوجيستي وزراعي عاملها هاجس والدول دي معروفة ومعروفه أسبابها.
الخلاصة سيناء وبحجم المشروعات اللي بتم هناك دلوقتي تقدر تقول كده إنها هتكون أول خطوة في نبؤة مصر الغنية زي ماقالت التقارير الدولية ولو ضفنا مشروع سينا بكل استثماراته على مشروعات تانية عملاقة في البلد زي الدلتا الجديدة والمناطق الصناعية الضخمة الجديدة بالإضافة إلي باقي موارد الدولة من الدولار والقطاعات الاقتصادية التانية مصر هتعدي المركز السابع في قائمة أغنى دول العالم والحلم بدأ والعجلة دارت ومصر بتجري رغم الأزمة المالية والظروف الحالية بس الموضوع عايز تعب وجهد لأن الدول مش بتنهض بالأحلام زي ماقال الرئيس السيسي في اكتر من مناسبة.
