إزاي العرب هيبقوا ملوك اقتصاد العالم ؟.. خطة الكبار

بعد سقوط الاتحاد السوفيتي العالم كله غير سياسته الاقتصادية بعد سنين في الشد السياسي بين أكبر قطبين في العالم، وبدأت مرحلة جديدة في حياة الدول والحكومات.. ومن هنا أظهرت التحالفات والكيانات الدولية والاندماجات بين الشركات الدولية، وكل مجموعة دول عملت منظمات للتعاون الاقتصادي من زي الاتحاد الأوربي والأسيان وجامعة الدول العربية ولغاية مجموعة البريكس وكله بيدور على مصلحته الاقتصادية وتحقيق أكبر قدر من الاستفادة.. ليه المقدمة دي كلها.. عشان النهاردة هنتكلم في موضوع كبير وعميق خاص بأهم كيان اقتصادي في العالم هو اللي بيملك المال ومصادر الطاقة والثروات والممرات التجارية والكلمة العليا في الأسواق.. وفلوسه مشغله أغلب مصانع العالم.. كيان هو نفسه مش عارف قيمة نفسه.. مين الكيان دا وايه علاقة مصر بيه

 
من يومين الفريق كامل الوزير كشف تفاصيل مشروع مهم جدا بين مصر والعراق والأردن وقال كلمة مهمة جدا محدش خد باله منها إننا مردناش نكشف أي تفاصيل عن المشروع الخطير غير لما يقرب يخلص على أرض الواقع وطبعا الوزير مكانش خايف من الحسد لكن كان خايف من عقدة كبيرة عندنا احنا العرب وهي إن أي محاولة للتعاون كان بيتم اجهاضها وإفشالها وكلنا عارفين إيه اللي كان يحصل وهي نفس المؤامرات اللي وقفت في وش السوق العربية المشتركة وعملة العرب الموحدة، وعشان مانخرجش بره الموضوع.. الوزير أتكلم في مشروع هيدي قوة إضافية للعرب في منطقة الشرق الأوسط وهو مشروع الخط التجاري العربي اللي بيجي من العراق والأردن وبيمر بمصر بهدف تصدير منتجات الخليج العربي والعراق والأردن لأمريكا وأوروبا من خلال شبكة طرق وأنفاق ومواني مصرية.. طبعا المشروع حاجة تفرح ومثال على التعاون العربي لما ينجح.

لكن النهاردة حابين نشوف الأمور من فوق شوية ومن زاوية كبيرة وكادر يجيب لينا الصورة كلها.. لأنه رغم الكلام اللي بيتقال على ضعف العرب وعدم تأثيرهم اقتصاديا لكن كل دا كدب وملهوش محل من الإعراب قدام لغة الأرقام والفلوس والبيزنس والتجارة واللي العرب فيها ملوك وهنشرح واحدة واحدة عشان الناس تستوعب معانا قد ايه احنا ياعرب امبراطورية اقتصادية مخيفة.

معروف إن مساحة الوطن العربي و(خلي بالك من كل رقم بنقوله)  13 مليون و488 ألفًا كيلو متر مربع، موزعين بين قارتي آسيا وأفريقيا وبطول سواحل 23 ألف كم تقريبا وعدد سكان الوطن العربي في 2022 وصل 453 مليون نسمة.. يعني لو هنتكلم عالى مساحة وسكان فالعرب قوة لايستهان بيها.
العرب عندهم صناديق سيادية بدير فلوس بحوالي 3.66 تريليون دولار.. الرقم حقيقي والاحصائيات رسمية على فكرة، والإمارات لوحدها بدير صناديق ثروة سيادية وأصول  بحوالي 1.66 تريليون دولار والباقي موزع على بقية السعودية وقطر والكويت وباقي العرب.

ولو جينا لجحم الناتج القومي هنلاقي إنه بحسب الأرقام الرسمية للمؤسسة العربية لضمان الاستثمار وائتمان الصادرات (ضمان) الناتج المحلي الإجمالي العربي وصل بمعدل 5.4% ليتجاوز 3.4 تريليون دولار في 2022.. خلو بالكم كل كلامنا دولقتي بالتريليونات مش المليارات.

ولو جينا لاستثمارات العرب في أوروبا فحسب أخر احصائيات وصلت 2 تريليون دولار ، يعني حضرتك كل النهضة والقوة الأوربية بتتمول من الاستثمارات العربية الرهيبة عندها، وفي الولايات المتحدة الأمريكية وصلت قيمة استثمارات 11 دولة عربية في أذونات وسندات الخزانة الأمريكية، بنهاية مارس اللي فات 253 مليار دولار، مرة واحدة.. وخلي بالك دي استثمارات سندات، بالإضافة لاستثمارات سعودية زي مابيقولوا في اللحم الحي للاقتصاد الأمريكي بتتراوح بين 800 مليار وترليون دولار وليك إنك تتخيل حجم التأثير السعودي على الاقتصاد الأمريكي.. كمان في حاجة مهمة في موضوع الاستثمارات العربية في الخارج إن الملكيات الخاصة مش محسوبة ودي بالمليارات طبعا زي القصور واليخوت والطيارات الخاصة بتاعة رجال الأعمال.

ولو جينا نتكلم عن ثروات العرب فكلنا عارفين إن العرب 
ملوك البترول والغاز وبيتحكموا فيه وليهم كلمة في السوق وبحصة أكتر من 49% من احتياطيات النفط المؤكدة عالميًا، وبلغت 870 مليار برميل بنهاية 2022 ووصلت احتياطيات الغاز الطبيعي في الدول العربية سنة 2021 حوالي 55.2 تريليون متر مكعب مثلت حوالي 26.9٪ من الاحتياطي العالمي من الغاز الطبيعي.

ولو جينا على مستوى خطوط التجارة الدولية والمواني فاحتلت المواني العربية في الشرق الأوسط المراكز الأولى في الإصدار الثاني من مؤشر أداء موانئ الحاويات على مستوى العالم وده تقرير حديث.. والعرب عندهم أحدث مواني في العالم وأضخمها زي مينا الملك عبد الله بالسعودية ومينا صلالة في عمان ومينا حمد في قطر ومينا خليفة في أبو ظبي، ومواني جدة وأبي قير والإسكندرية ومواني بورسعيد والسخنة في مصر وكلها مواني بتتفوق على المواني الأوربية، ولو هنتكلم على المواني العربية لازم نتكلم على ممرات التجارة الدولية واللي معظمها في ايدين العرب وبتمر في مياهها الإقليمية زي الخليج العربي و مضيق باب المندب ومضيق هرمز، ومضيق جبل طارق وقناة السويس أهم ممر مائي في العالم.
لو اتكلمنا من هنا للسنة الجاية عن قوة العرب مش هنخلص لكن الجديد إنه أخيرا القوة دي بدأت تتسخر لخدمة ورخاء الشعوب العربية وفي السنين الأخيرة بدأ التعاون يزيد بين العرب والاستثمارات العربية بقت تعمر وتبني في الدول العربية ولو تابعنا كم الزيارات المتبادلة والاتفاقيات الموقعة  والمشروعات هنلاقي إن فيه فعلا ثقافة جديدة للتعاون الاقتصادي وعشان كده ظهر خط التجارة العربي اللي قال عليه الفريق كامل الوزير، وعشان كده ظهرت مشروعات الربط الكهربائي بين العرب والاستثمارات العربية الضخمة في مصر واللي وراها أسباب تانية مهمة وهي إمكانيات مصر العلمية والاقتصادية والبشرية واللي أخيرا العرب بدأو يستغلوا دا في تقوية مركز القوة في العالم العربي لانهم عارفين إن مصر مشكلتها الكبيرة في التمويل واللي لما يتوفر هتنطلق بسرعة الصاروخ ومعاها طبعا خواتها العرب.
ولأول مرة مصر بتخطط صح وماشية كل خطوة بحساب واللي حصل في الـ8 سنين أخيرة بيقول إنه لو محلصتش كروونا ولا الخرب الروسية كان زمانها دولة تانية بجد ولو فيه تمويل ضخم كانت زمانها كيان اقتصادي بيناطح أوروبا..ودا اللي العرب فهموه في الشهور الأخيرة.
الموضوع ملهوش علاقة بالاخوة والعواطف قد ماهو مرتبط بالمصالح والمصير المشترك ولان دول الخليج الغنية جربت غدر أوروبا وتركيا وأمريكا فكانت لازم تعمل ضهر قوي ليها وضهر وطني يحميها عشان كده هنشوف استثمارات عربية ضخمة في مصر الفترة الجاية.