رسميا مصر تتحرر من هيمنة الدولار.. خطوة هتقلب الموازين

 من حوالى شهر تقريبا الجريدة الرسمية نشرت خبر مهم جدا ناس كتير مخدتش بالها منه ولا ركزت معاه ولا عرفت ايه تداعياته على الأسواق والخبر كان بيقول ان الرئيس عبد الفتاح السيسي صدق على اتفاقية تأسيس بنك التنمية الجديد التابع لتجمع "بريكس" ووثيقة انضمام مصر إلى البنك.. كمان فيه تطور جديد حصل امبارح بيقول ان مصر جادة جدا في ملف التحرر من الدولار الأمريكي وانها مش هتفضل رهينة لنفوذ وسيطرة العملة الأمريكية .. فيا ترى ايه اللى حصل ؟ وهل فعلا ممكن نستغني عن الدولار؟ وتأثير ده ايه على حجم تجارتنا الخارجية؟
 
السفير الروسي في القاهرة جورجي بوريسينكو أعلن ان مصر قدمت طلب رسمي للانضمام إلى مجموعة بريكس وقال في مقابلة مع وسائل إعلام روسية ان مصر عاوزة تنضم لبريكس بسبب ان واحدة من المبادرات اللي بتشارك فيها بريكس حاليا هي تحويل التجارة إلى عملات بديلة قدر الإمكان سواء كانت وطنية أو إنشاء نوع من العملات المشتركة ومصر مهتمة جدا بالأمر ده. 
ومجموعة البريكس دي من أهم التجمعات الاقتصادية على مستوى العالم وهي اختصار للحروف الأولى باللغة الإنجليزية للدول المكونة للتجمع، وهي: البرازيل وروسيا والهند والصين وجنوب أفريقيا، وبيمثل تجمع البريكس حوالي 30% من حجم الاقتصاد العالمي، و26% من مساحة العالم و43% من سكان العالم، وبتنتج الدول الأعضاء في التجمع أكتر من تلت إنتاج الحبوب في العالم.
تحرك مصر للانضمام الى البريكس بيتزامن مع تصريحات أدلى بيها وزير التموين على مصيلحي من كام يوم واتلكم فيها على ان مصر بتدرس سداد أموال واردتها بعملات تانية غير الدولار .
وقال ان فيه مناقشات في الاطار ده مع عدد من الدول منهم الهند والصين وروسيا وان مصر هتدفع سعر الواردات من الدول دي بالعملات المحلية زي الروبية واليوان والروبل وطبعا ده هيخفف الضغط كتير اوى عن الدولار وهيخلي فيه خيارت وبدائل أرخص لكل السلع تقريبا.