لقطة القاعة.. سر احتفاء الرئيس السيسي بحسن عبدالله محافظ المركزي

امس الخميس حصلت لقطة مهمة جدا في افتتاح الرئيس عبد الفتاح السيسي لمحطة تحيا مصر بميناء الإسكندرية وبعدها استمع الرئيس لشرح من الفريق كامل الوزير وزير النقل لتفاصيل المشروع وقصة التمويل الذاتي واللي وصلت ل10 مليار جنيه تقريبا من غير ولا مليم سلف.. ليه الوزير ذكر اسم حسن عبد الله محافظ البنك المركزي وليه محافظ البنك المركزي كان قاعد على يسار الرئيس مباشرة في القاعة بالصف الأول وايه علاقة البنك المركزي بالمشروعات

معروف إن البنك المركزي المصري هو اللي معاه مصروف الدولة ببساطة زي رب المنزل كده هو اللي بيوفر فواتير القروض والفلوس الداخلة واللي خارجة من البلد وكمان هو بيوفر التمويل للمشروعات القومية من خلال البنوك المصرية اللي بيشرف عليها أو من خلال اشرافه على القروض اللي بتيجي على حس المشروعات القومية من بره دا غير مسؤولياته التانية الكتيرة جدا زي تنظيم سوق الصرف والتصدي لأي محاولة لإرباك أسواق الصرف زي مواجهة السوق السودا وحماية العملة الوطنية وحماية أموال المودعين في البنوك.

ولفتة إن محافظ البنك المركزي المصري يقعد جمب الرئيس نهاردة دي زي تكريم للبنك المركزي واللي كان ليه دور كبير في توفير الاعتمادات المالية للمشروع العملاق زي ما أشار وزير المالية في كلمته وإنه كان فيه تواصل مستمر  مع البنك المركزي عشان المشروع القومي يخرج للنور بالتكلفة العالية دي.
ولو هنتكلم على جهود البنك المركزي في الشهور اللي عدت هنعرف قد ايه هو رمانة الميزان في المنظومة الاقتصادية وإزاي قدر يدير أزمة الدولار بحرفية شديدة في وقت مطلوب منه يوفر عملة صعبة للشركات والافراد ورجال الأعمال وللبضايع في الجمارك ومطلوب منه كمان يوفر فلوس لاستيراد السلع الأساسية بتاعة الدولة ومستلزمات الإنتاج للمشروعات والهيئات الحكومية الله شغالة وبتحتاج قطع غيار وليلة كبيرة جدا دا .. ضيف على دا كله مهمته في مواجهة التضخم وتسديد أقساط الديون والتفاوض مع المانحين والإشراف على كل كبيرة وصغيرة في البنوك اللي في مصر كلها والتصدي للتطور التكنولوجي في قطاع المصارف والأمن السيبراني وبناء الكفاءات المحترفة من الشباب.

كل النتائج بتقول إن البنك المركزي المصري هو بطل المرحلة اللي فاتت واللي جاية وإن وجود المصرفي الكبير حسن عبد الله النهاردة مع الرئيس رسالة لقوة ومكانة البنك في الدولة وإنه عنصر أساسي لتوفير التمويل وضبط السياسة المالية وفي كل مرة رجالة المركزي بتثبت إنها قد المسؤولية وانها قادرة تدير أي أزمة بقوة وثبات ودي بشهادة البنوك والمؤسسات المالية الدولية وكفاية إدارة عملية تحرير الجنيه واللي ثبتت إن عبد الله عنده خبرة سنين في إدارة أي مشكلة مهما كانت عصية على الحل.