فكر قبل ما تقرر.. الحر أحسن ولا الوظيفة؟
في ناس بتخش في حيرة.. يا ترى نستمر في الوظيفة ولا ندوس في الاستثمار والتجارة” العمل الحر ”.
فى الحقيقة الأفضلية بتتحدد حسب ظروفك الخاصة.. زي مدى قدرتك على الاستثمار وعلاقاتك الشخصية، ووضعك العائلي وموقفك من المخاطر.
والوظيفة أو التجارة لكل واحدة منهم إيجابيات وعيوب لازم تعرفها وتاخد بالك منها.. يعني مثلًا العمل الحكومي بيكون محدد ومعروف.. وعارف دخلك الثابت كام وهاتصرفه فى اية أما العمل الحر ممكن يتسببب فى أن دخلك يكون أكبر بكتير لكنه متغير حسب السوق اللى أنت شغال فيه وحسب نوع العمل أو الخدمة اللى بتقدمها
المرونة فى جدولك الزمني.. يعني لو كنت شغال فى عمل حر فأنت طبعًا بتختار الوقت اللى بتشتغل فيه.. ومقدار ساعات العمل فى اليوم... وهل دا الصبح ولا بالليل.. لكن دا طبعًا مش متوفر فى العمل الحكومي والوظائف الخاصة.
أنت رئيس نفسك.. ومن إيجابيات العمل الحر برضوا هو عدم وجود رئيس.. يعني مايبقاش موجود بقى رئيس يحددلك الموعد النهائي لإنجاز المهام ومايتحكمش كمان في طريقة إنجازها.
هاتصرف أقل.. وعلشان نكون عاارفين فالتقليل من المصاريف هايحصل لما تختار أنك تعمل كمستقل.. يعني تقدر تشتغل من البيت.. وبكدا مش هايكون فى تكلفة الانتقال والمواصلات والأمور دي.. ومش هايبقى فى وقت مرهق علشان تستعد وتروح العمل يوميًا
لكن من مشكلات العمل الحر واللى لازم تاخد بالك منها.. هو أن العمل الحر مش ثابت وبيتعرض دايما لتقلبات السوق والأحوال الاقتصادية.. لكن فى الوظيفة بتكون عارف دخلك كام فى الشهر بشكل محدد وثابت .. والأفضل أنك تشتغل فى مكان يجبلك دخل وبشكل ثابت خلال الفترة الأولى للعمل الحر.
