مفاجآت البنك المركزي!!

باقي 9 أيام على موعد اجتماع لجنة السياسة النقدية في البنك المركزي المصري في 22 يونيه الجاري لحسم سعر الفايدة وحسم الجدل على تحرير الجنيه، والقرارت المتوقعة اللي هتصدر عن الاجتماع المهم جدا لأنه جاي بعد ظروف صعبة كتير وزيارة لمسؤلة صندوق النقد الدولي وصدور عشرات التقارير المتضاربة عن الاقتصاد المصري وأزمة الدولار وسعر الجنيه.. ياترى إيه هي المفاجآت المتوقعة لاجتماع المركزي
 

حالة من الترقب الحذر بيعيشها القطاع المصرفي والمستثمرين في انتظار قرارات لجنة السياسة النقدية بالبنك المركزي 
2023، لبحث سعر الفايدة في مصر للربع التالت من 2023، بالتزامن مع اجتماع البنك الفيدرالي الأمريكي الأسبوع الجاري لمناقشة سعر الفايدة الأمريكية للربع التالت من العام الجاري وده بيديه أهمية كبيرة جدا لأن البنوك المركزية في العالم بتنتظر قرار الفدرالي عشان تشوف هتعمل إيه وإن أغلب بنوك العالم المركزية بتمشي ورا قرار الفدرالي واللي معظم الخبراء بيأكدوا إن الاحتياطي الفيدرالي هيثبت سعر الفايدة بكرة الأربعاء.

نرجع لمصر ونقول اللي بيتوقعه الخبراء للقرار المنتظر وهو إما التثبيت وهو الأرجح أو الرفع 100 نقطة أساس عشان السيطرة على التضخم اللي أرقامه رفعت في مايو ووصلت لـ40% ودا أكيد وارد، ومعاه احتمال تصدر البنوك شهادات إدخار بعائد ضخم ممكن توصل لـ25% ، وبخصوص تحرير سعر الجنيه فدا مستبعد بشكل كبير بسبب استقرار أسعاره قدام الدولار ومع التقارير الدولية اللي بتأكد إن الدولار متوافر في مصر والمشكلة في إدخاله البنوك الرسمية بجانب عدم عدالة تقويم الجنيه واللي واخد أقل من سعره الحقيقي,

تسريبات اجتماع مسوؤلي صندوق النقد الدولي كانت مفاجأة بعد التأكيد إن الصندوق مطلبش تحرير للجنيه وإنه مش بيضغط على الحكومة المصرية في الطريق دا، على عكس كل الاشاعات والتقارير الدولية اللي ادعت إنه شرط أساسي من شروط صندوق النقد.

كل أسباب استقرار الجنيه والأسواق والوفرة المحتملة في الدولار ممكن تدفع البنك المركزي لإصدار قرارات مفرحة للسوق والمستثمرين والقطاع المصرفي لدرجة البعض بيحلم بتخفيض سعر الفايدة وهو احتمال مش بعيد مع حالة الاستقرار الكبيرة في الاقتصاد والتنوع وارتفاع وتيرة الاستثمار المباشر والنظرة التفاؤلية الكبيرة اللي بتروج ليها دلوقتي حتى المؤسسات الدولية اللي كانت بتهاجم الجنيه.