ضربة الفدرالي الأمريكي المنتظرة لمصر.. ايه اللي هيحصل في السوق النهاردة

العالم كله عارف إن البنك الاحتياطي الفيدرالي الأمريكي في اجتماع النهاردة عشان يحسم سعر الفايدة في الفترة اللي جاية، بعد رفعها في اجتماعه السابق لأعلى مستوياتها من 16 سنة.. طيب ليه العالم كله بيحبس أنفاسه لما الفدرالي بيجتمع وليه بيتصدم لما يرفع سعر الفايدة وإزاي تأثير القرار بيعدي المحيط عشان يأثر في اقتصاديات كل الدول وخاصة النامية زي مصر.. هنشوف مع بعض ليه مصر هتتأثر.
فااصل
في الاقتصاد أي رفع لسعر الفايدة الأمريكية بسبب مشاكل كتير للدول النامية لأنه باختصار بيتسبب في هروب الاستثمار السريع من عندك والأموال بتروح تستثمر في السندات الأمريكية  عشان سعر الفايدة العالي واللي معناه أرباح كتيرة بالنسبة للمستثمر والمال الساخن حول العالم، بدل مايروح يستثمر في دول تانية وكمان رفع الفدرالي للفايدة بيسبب في نقص السيولة من الدولار والعملات الأجنبية ببعض الدول النامية زي الأزمة اللي عندنا كده رغم اختلاف الأسباب لكن جزء كبير من الدولارات خرجت من مصر واستثمرت في السندات الأمريكية بعد سلسلة رفع الفايدة والتشدد النقدي من الفدرالي في الاجتماعات الأخيرة.

يعني معظم الخبراء بيأكدو إن رفع سعر الفايدة الأمريكية بيزيد  احتمالية خروج الاستثمارات غير المباشرة من الدول النامية زي مصر بالإضافة طبعا لصعوبة جذب استثمارات غير مباشرة تانية أو جديدة.

الحاجة الأخطر والأصعب لو الفدرالي رفع الفايدة هي ارتفاع تكلفة الديون بالدولار وارتفاع أسعار السلع المستوردة، والحاجتين مصر بتعاني منهم بشكل كبير بسبب فاتورة أقساط الديون وارتفاع فاتورة الاستيراد بشكل كبير، وده هيسلمنا على طول لقفزة جديدة في التضخم واحنا مش ناقصين وكفاية أرقام مايو واللي عدت فيها نسب التضخم الـ40%، ولو حصل اضطراب في سوق الدولار طبعا تأثيره هيوصل لأسواق الدهب في مصر وإحنا عارفين أي أزمة الناس عندنا بتجري على الدهب زي ماحصل قبل كده كتير ومع ارتفاع الطلب الأسعار هترجع تزيد تاني بعد الاستقرار.

ومش بنبالغ لو قلنا مصر من أكتر الدولة في العالم اللي بتتأثر بارتفاع أسعار الفايدة على الدولار للأسباب اللي قلناها كلها.

رغم إن فيه توقعات كتير بتثبيت الفدرالي للفايدة بكرة أو رفعها بشكل قليل لكن لسه فيه خوف في الدول الناشئة لأن رفعها فعلا بيسبب معانأة وبيجي على حساب حياة الشعوب وفاتورة المعيشة الصعبة.