ليه مصر متقدرش تستغني عن الدولار ومنضمتش للبريكس
في الفترة الأخيرة كتر الكلام عن تحركات دولية كتير بتقودها روسيا والصين العدوين الشرسين للولايات المتحدة الأمريكية لاستبدال الدولار بالعملات الوطنية أو عن طريق استحداث عملات جديدة للتعامل بيها في المعاملات التجارية بين الدول والحقيقة فيه دول كتير بتتجه لبديل الدولار بسبب سياسة امريكا العقابية واستغلال الدولار في خنق الشعوب والدول اللي مختلفة معاها في مصالحها زي ما حصل مع روسيا وقبلها الصين وعشان كده ظهرت مجموعة دولار بريكس وتجمعات تانية في امريكا الجنوبية وحتى في المنطقة العربية وخاصة الخليج فيه دول عملت صفقات تجارية دولية بعملاتها الوطنية زي ما حصل بين الإمارات والهند والسعودية والصين.. مفيش شك اختراع عملات بديلة للدولة هيضعف الوحش الاخضر لكن في المقابل والعقل وموازين الاقتصاد والثروات والامكانيات العلمية والاقتصادية المهولة للولايات المتحدة والدول اللي بدور في فلكها بتأكد إن الدولار هيفضل عملة العالم لسنين كتير جاية.. ايه هي قوة الدولار وليه مصر ماتقدرش تستغني عنه كعملة دولية .
لو هنتكلم اقتصاد ويعيد عن العواطف الدولار الأمريكي هيفضل بقوته ولو هنتكلم بالأرقام فحضراتكم 62% من الدين العالمي، و56% من القروض الدولية، و 44% من حجم تداول العملات الأجنبية، وما يقرب من 60% من احتياطيات النقد الأجنبي في العالم كله محسوبة بالدولار الأمريكي بحسب بنك التسوية الدولي
والدولار الأمريكي هو العملة الأقوى منذ بداية 2021 مقابل العملات الرئيسية، ولغاية دلوقتي وكمان كل قروض صندوق النقد الدولي معتمدة بالدولار دا غير قوة الاقتصاد الأمريكي واللي حضرتك سجل 23 تريليون دولار في 2021 وبنسبة 25% من الناتج الاقتصادي العالمي في نفس السنة يعني ربع الناتج القومي لكل دول العالم بما فيهم أوروبا والصين والهند والنمور والفهود والاسود الاقتصادية .
وخلينا كمان نقول حاجة مهمة جدا وعقلانية تخلي الدولار سيد العملات لسنين طويلة جاية وهي القوة الرهيبة للسياسة الأمريكية في العالم واللي بتخدم عليها قوة عسكرية مخيفة وفيه دول كتير جدا بتخضع ليها ودول مهمة اقتصاديا وبالبلدي كده امريكا بتحميها زي اليابان وكوريا الجنوبية وتايوان وأوروبا نفسها اللي اكبر حلف بيحميها وهو الناتو اختراع أمريكا وبتسيطر عليه امريكا والمقصود إن واشنطن عندها حلفاء أقوياء مايقدروش يخالفوها وأكيد مش هيقفوا في وش الدولار.
الكلام كتير في قصة قوة الدولار عالميا حتى لو طلعت عملات بديلة فدا مش هيقضي عليه لكن ممكن يضعفه وفي نفس الوقت تدمير الكيانات الاقتصادية الجديدة هيكون هدف للقوة السياسية والاقتصادية وجائز العسكرية للولايات المتحدة وساعتها ممكن دول في الكيانات دي تتراجع.
نيجي بقى للموضوع اللي يهمنا احنا كمصر ليه منقدرش نستغنى عن الدولار .. شوف يا فندم في مايو اللي فات 2022 الدكتور مصطفى مدبولي وقف وقال قدام بعثة تجارية أمريكية كانت بتزور مصر إن الولايات المتحدة شريك استراتيجي رئيسي، وأن مصر يتسعى بقوة لتعزيز العلاقات الثنائية والتعاون بين القاهرة وواشنطن.
وأكد رئيس الوزراء إن إجمالي الاستثمارات الأمريكية في مصر التراكمية وصلت 24 مليار دولار بحلول 2022 ووصلت في 2021 حوالي 1 مليار دولار وكمان معظم ديون مصر الخارجية 155 مليار دولار بالعملة الأمريكية والقروض بالامريكاني ده غير طبعا إن فيه مصالح واتفاقيات استراتيجية بين مصر والولايات المتحدة ودي ليها بعد خاص بالأمن الإقليمي والأمن القومي لمصر بالإضافة لملف المساعدات واتفاقيات الكويز ودي لوحدها قصة تانية لأنها الاتفاقية اللي بموجبها بضاعتك المصرية بتدخل السوق الامريكي والولايات المتحدة بتستحوذ على 75% من صادرات مصر لأمريكا الشمالية وعشان كده مصر بتفكر كويس جدا في موضوع البريكس ولغاية دلوقتي مانضمتش رسميا للتجمع حتى لو كانت انضمت للبنك التابع للمجموعة.
