الدولار هيوصل 100 جنيه والمسؤولين بيهربوا.. ليه الناس بتصدق الإشاعات
النهاردة هنتكلم في موضوع مختلف خالص عن موضوعاتنا العادية .. هنتكلم عن مشكلة بسيطة من وجهة نظر ناس كتير لكن في الحقيقة بتمثل كارثة على مستوى الاقتصاد ونفسية الشعب المصري كله واللي بيبقى أسير اشاعات وأكاذيب مضللة ودا لأنها مش عفوية زي ما احنا فاكرين.. لا وراها جهات وكتائب إلكترونية معلومة ومجهولة وشغالة ليل نهار وبتغذيها جهات عارفة هي بتعمل كويس.. ايه اللي بيحصل على السوشيال ميديا ومواقع التواصل الاجتماعي وايه هي الكيانات الموازية جوه وبره واللي مش عاوزة بلد تنطلق.
لو قاعد على قهوة واسمعت اتنين بيتكلموا وجابو سيرة الدولار والأسعار هتلاقى واحد فيهم قام وقال بكل ثقة ياعم الدولار هيوصل 100 جنيه وكيلو اللحمة هيوصل ألف جنيه واللي جاي خراب ولما تسأله جبت المعلومة منين يقولك قريتها على الفيسبوك ودا كلام اكيد كتير من حضراتكم بيسمعه ليل نهار في القهوة والميكروباص وفي الشغل وفي البيوت وفي طابور المعاشات والعيش.
عايز تهدم أي بلد سلط عليه الإشاعات المضللة واللي بتستغل الوضع الاقتصادي عشان تغذي النظرة السلبية اللي عند الناس وتكرهم في بكرة، وموضوع الإشاعات والتضليل دا بياخد اكتر من شكل يعني ممكن يكون تقرير مشبوه من جهات دولية زي بنوك عالمية أو وكالات تصنيف واللي كلها في النهاية مرتبطة بشركات ودول ورجال أعمال وليهم أهدافهم الخاصة بعيد عن مؤشرات الاقتصاد الحقيقة وممكن تلاقيها على هيئة حملات منظمة وتحليلات اقتصادية في برامج متخصصة تحس انها صاحبة مصداقية وهي في الحقيقة بتحط السم في العسل ووسط ،100 معلومة صح تحشرلك معلومة غلط عشان عارفة إنها هتعلق مع الناس وهينشروها.
الخطر في مؤامرة الإشاعات والمعلومات الضالة إنها بتسمع بشكل كبير بين المستثمرين والإعلام الدولي واللي بياخدها حجة عشان يضربلك الاستثمار ويزود الغضب في نفوس الناس زي كده إشاعة تجميد دول الخليج للاستثمارات بتاعتهم في مصر وانسحاب الشركات من المشروعات ودي كانت الإشاعة الأخطر واللي عملت بلبلة كتير وسط الناس وكل السوشيال ميديا اشتغلت عليها من غير ما يكون ليها اي مصدر صحة، وزيها زي إن الدولة بتنهار عشان كده قررت تبيع الشركات بتاعة الدولة وكانت اغرب إشاعة إن فيه مسؤولين ورجال أعمال بيهربوا من البلد لأن المركب قربت تغرق.
ولأننا قلنا في الأول إن كلامنا مختلف هنقولك خلي بالك مصر حواليها اعداء من كل حتة ومتابعين اللي بيحصل عندك كويس وكل ما تلاقي الإشاعات زادت في البلد يبقي مصر بتنطلق وماشية في الطريق الصح، ولما تلاقي الدنيا بدأت تظبط في الاقتصاد بشهادات دولية محترمة والاستثمار بيقفز عندك وكل القطاعات الاقتصادية محققة نتايج عظيمة والمشروعات في كل شبر هتقابل اشاعات كتير ومقالات وتحليلات هتطلع تشكك في الدولة والحكومة والسياسات الاقتصادية.. ساعتها لو صدقتهم يبقي انت بتساعدهم في المؤامرة.
