المصرفي اللامع يواصل رحلة النجاحات الكبيرة: الاتربي رئيسا لـ "سي أي كابيتال"
من حوالي 46 سنة بدأ المصرفي اللامع محمد الاتربي رحلته في عالم البنوك، رحلة مكنتش أبدا سهلة، لكنها مليانة محطات نجاح وتحديات كبيرة، و بعد المسيرة المشرفة دي بيجني الاتربي ثمار جهده وتعبه.. وأفكاره اللي غيرت كتير من المفاهيم المصرفية.. وساهمت في اعتلاؤه أرفع المناصب كان آخرها رئاسة واحد من أعرق وأهم البنوك فى مصر والشرق الأوسط بنك مصر وكمان انتخابه رئيسا لاتحاد بنوك مصر ورئيس اتحاد المصارف العربية.
والنهاردة تم الاعلان عن انتخاب الأتربي رئيسا لمجلس إدارة شركة سي أي كابيتال القابضة للاستثمارات المالية، اللى بتعتبر من الشركات الرائدة في مجال الخدمات المالية.
ومع وصول الاتربي الى مقعد الرئيس هتبدأ سي آي كابيتال مرحلة جديدة فى تاريخها، مرحلة بيقودها فيها مصرفي ما يعرفش غير النجاح ولا يعترف الا بالعمل والتخطيط والمثابرة وصولا الى النتايج المطلوبة والمخطط ليها.
شخصية «الإتربي» القيادية، مكنته من صناعة التغيير في الأماكن اللي تولى قيادتها، وكان اسمه حاضر دايمًا على قمة هرم قيادات القطاع البنكي في مصر.
وتاريخيا الإتربي هو الرئيس رقم 13 لبنك مصر، تولى رئاسة البنك في يناير 2015، بعد سلسلة من الإنجازات في القطاع المصرفي وحقق خلال مسيرته فى البنوك نجاحات عظيمة.
وأغلب اللى بيشتغلوا فى القطاع المصرفي بيوصفوا الاتربي بالمؤسس التاني لبنك مصر لانه قدر بإدارة احترافية يعيد هيكلة البنك العريق الذلي قام بتدشينه طلعت باشا حرب عام 1920 كأول بنك برأسمال وطني 100%،
نجح الاتربي خلال ادارته لبنك مصر فى عبور أصعب الأزمات اللى عانى منها القطاع الاقتصادي فى مصر خلال السنين اللى فاتت واصبح قلعة مصرفية ومالية، تتمتع بالحضور القوي محليا وإقليميا ودوليا.
وتمكن الإتربي خلال 8 سنين من الارتقاء بحجم أعمال وأرباح ومؤشرات الأداء المالي الخاصة ببنك مصر، وفى عهده ارتفع إجمالي المركز المالي للبنك من 274.3 مليار جنيه في يونيو 2014 إلى 1.6 تريليون جنيه في نهاية 2021، وبنسبة نمو بلغت 483%، بينما ارتفعت محفظة قروض البنك من 54.6 مليار جنيه في يونيو 2014 إلى 590.6 مليار جنيه بنمو 980% خلال 7 سنوات.
مش بس كده الاتربي نجح كمان انه يحقق المعادلة الصعبة بالموازنة بين دور البنك في مساندة الدولة في أوقات الأزمات ويكون درع تحتمي بيه، وحائط صد في مواجهة الصعاب وبين تحقيق مؤشرات مالية قوية تتصدرها أرباح مليارية وأصول وودائع تريليونية.
بدأ الإتربي رحلته فى القطاع المصرفي عام 1977 فى البنك العربي الأفريقي الدولي بعد عام واحد من تخرجه من كلية التجارة بجامعة عين شمس، وبعدها انتقل إلى بنك الائتمان الدولي عام 1983، ومنه إلى بنك مصر الدولي «قطر الوطني حالياً».
كل اللى اتعاملوا مع الاتربي فى البنوك اللي اشتغل فيها أجمعوا على حاجة واحدة هي كفاءته وهدوء في ادارة الأزمات وايجاد حلول لأي مشكلة تواجهه في شغله.
وشغل «الإتربي» العديد من المناصب القيادية، على رأسها رئاسة مجلس أمناء مؤسسة بنك مصر لتنمية وخدمة المجتمع، والرئيس التنفيذي والعضو المنتدب للبنك المصري الخليجي من يناير 2013 وحتى ديسمبر 2014، مما أهَّله لأن يتولى قيادة بنك وأن يصبح رئيسًا لاتحاد بنوك مصر من إبريل 2020، ورئيسًا لاتحاد المصارف العربية من مايو 2022 ولحد دلوقتي.
كل التوفيق للمصرفي الكبير محمد الاتربي فى سي آي كابيتال وفي المناصب اللي بيشغلها وبيضيف ليها من خبراته
