اتفاقية الموسم بين مصر والسعودية.. ايه اللي حصل
معروف أن السعودية أكبر شريك تجاري عربي لمصر وحجم التجارة الضخم بين البلدين بيأكد قوة العلاقة بينهم وبين في أي إشاعات بتطلع وتقول إن السعودية أو الخليج بيسحب استثماراته من مصر.. والنهاردة مصر والسعودية وقعوا اتفاقيات مهمة جدا نتغير شكل الصناعة في مصر .. ياترى ايه اللي حصل وايه الاتفاقيات دي وايه حكاية توطين صناعة السيارات في مصر بتعاون سعودي.
النهاردة المهندس أحمد سمير وزير التجارة والصناعة ووقع اتفاقيات مهمة جدا في مجال صناعة السيارات وتنمية الصادرات غير البترولية بجانب التكامل الصناعي بين البلدين وهنا نحط 100 خط تحت العبارة الأخيرة لأن معناه طفرة في توطين الصناعات التقيلة والمتوسطة والإلكترونية في مصر بمعاونة المملكة العربية السعودية واللي معاها الفلوس اللي تقدر تمول بيها المشروعات الضخمة دي.
يعني الزيارة بتنقل العلاقات الاقتصادية في حتة تانية خالص بين البلدين وبتهدف لتحويل مصر لمراكز للصناعات اللي بتستوردها من بره واهمها صناعة السيارات واللي بتحتاج لاستثمارات ضخمة لأنها صناعة معقدة ومصر بتستورد بمبالغ ضخمة كل سنة من موديلات السنة والاتفاقية الجديدة هتساعد في توطين الصناعة وتسمح لمصر بالتصدير كمان، ودا مش صعب ومستحيل لأن مصر مش هتبدأ من الصفر وعندها فعلا صناعة سيارات ووسائل نقل وعندها شركات متقدمة بتصدر أتوبيسات فخمة لانجلترا وصدرت للسعودية نفسها.
وعشان نبقى عارفين حجم الاستثمارات السعودية فى مصر تجاوز 6 مليار دولار في قطاعات الصناعة والإنشاءات والسياحة والزراعة والخدمات والتمويل والاتصالات وتكنولوجيا المعلومات وكمان معدلات التبادل التجاري السلعي بين البلدين وصلت سنة 2022 لحوالي 5,665 مليار دولار مقارنة ب 4,572 مليار دولار سنة 2021 يعني كل سنة فيه زيادة في حجم التجارة بسك عام.
لكن ايه الحكايه .. شوف حضرتك النهاردة بندر الخريف وزير الصناعة والثروة المعدنية السعودي جي مصر ومعاه وفد ضخم من رجال التجارة والاستثمار والصناعة السعوديين وزارو العاصمة الإدارية الجديدة لتعزيز التعاون المشترك بين البلدين فى مجالات التجارة والصناعة والاستثمار وأكيد وفد بالشكل ده مش هيجي عشان يتصور ويروح بلدهم .. لأ الوفد جاي ومعاه مشروعات واضحة وصريحة ورؤية شاملة لتطوير التعاون الصناعي مع مصر واللي هتدخل مرحلة التنفيذ مباشرة.
ومعروف إن صناعة السيارات بالذات بتجيب إيرادات بالمليارات ولو نجح المشروع المصري السعودي الكبير مصر هتكسب مليارات كل سنة من تصدير السيارات واللي كل عوامل نجاح المشروع متوفرة في البلدين سواء راس المال أو العمالة المدربة والكوادر البشرية والموقع الجغرافي المميز.
