تجارة بـ20 مليار دولار في انتظار مصر .. تركيا خدت الخطوة الأولى
في السياسة قانون أزلي بيحكم العلاقات بين الدول وهو لاصداقة دائمة ولا عداوة.. بس مصالح مشتركة دايمة والسياسة في الأصل اخترعوها عشان تخدم على الاقتصاد والعكس صحيح والحقيقة يحسب للسياسة المصرية أنها حافظت رغم التوترات مع تركيا وقطر في السنين الأخيرة على علاقات اقتصاديه دائمة واستمرت العلاقات التجارية وموقفتش ولما رجعت العلاقات جي الوقت العلاقات التجارية تضاعف بين مصر وتركيا زي ماحصل مع قطر واللي اتعهدت باستثمارات ضخمة في مصر الفترة الجاية.. ايه اللي حصل واتقال في تركيا عن حجم التجارة الضخم المنتظر بين البلدين وازاي ممكن يحل جزء كبير من أزمة الدولار في مصر..خليكم معانا عشان التفاصيل كتير.
القائم بالأعمال التركي في مصر، السفير صالح موتلو طلع وقال في تصريحات صحفية إن العلاقات بين مصر وتركيا الفترة الجاية هتشهد انتعاشة ضخمة على المستوى الاقتصادي بعد التقدم في العلاقات السياسية وقال موتلو إن حجم التبادل التجاري بين البلدين سجل 9.7 مليار دولار في 2022، وأكد إن الرقم دا هيضاعف في السنين القليلة اللي جاية وهيوصل 20 مليار دولار سنوياً وذكر حجم الاستثمارات التركية في السوق المصري حاليا واللي بتوصل ل 2.5 مليار دولار .
طبعا تركيا دولة متقدمة في مجالات كتير ووسيط بين الشرق وأوروبا وهي دولة إقليمية وحجم الاستثمارات التركية في الفترة الأخيرة ارتفع بشكل كبير وخاصة في مجال الأجهزة المنزلية والملابس واللي بتتميز فيها تركيا وفيه جانب تاني مهم في العلاقات وهي السياحة المشتركة ودايما مصر وتركيا كانت أهم مقصدين في الشرق الأوسط وعشان كده كانت تيجي رحلات دولية بتشمل زيارة مصر وتركيا.
كمان فيه جمعية رجال الأعمال الأتراك المصريين «تومياد» ودي كان ليها دور كبير في استمرار التعاون المشترك وقت الأزمة الدبلوماسية، ووفد كبير منها ومش رجال الأعمال الأتراك زار مصر في شهر 8 اللي فات لحث سبل التعاون وزيادة الاستثمارات والتبادل التجارى وحضر الاجتماع القائم بالأعمال السفير صالح موتلو واللي طلع وقال التصريحات الأخيرة عن الطفرة المنتظرة في التجارة بين البلدين.
وحسب خبراء الاقتصاد السوق التركية فيها اكتر من ميزة للمنتجات المصرية أهمها إنه سوق قريب من ناحية المسافة ومن ناحية الذوق الاستهلاكي والأتراك شعب عاداته قريبة من عاداتنا والخبرا من وجهة نظرهم التعاون الاقتصادي هيتوسع في الفترة الجاية وممكن يشمل مميزات خاصة زي مناطق تجار حرة وتصنيع مشترك وغيرها من المجالات.
