توقعات بهبوط أسعار الدهب

أسعار الدهب رايحة على فين؟ أحداث متوقعة تحسم مستقبل المعدن النفيس؟ 
يا ترى اسعار الدهب رايحة على فين؟ وإيه اللى هيحصل من دلوقتى لنهاية 2023؟ وليه الاسعار بقالها شهر بتتراجع عالميا؟ وهل الموافقة على رفع سقف الدين الأمريكي ممكن تخلى الدهب يواصل النزيف؟ وايه الوضع عندنا فى مصر الفترة الجاية؟ 
 
اللى متابع السوق العالمي للدهب هيلاحظ ان الاسعار فى اخر شهر واخدة اتجاه هبوطي وكل يوم تقريبا بيحصل تراجع لسعر الدهب فى البورصة العالمية، ورغم ان الدهب كان وصل الى نقطة مقاومة عن 2080 دولار الا انه فشل يخترقها والأسعار رجعت تنزل تانى لغاية ما وصل النهاردة تقريبا الى 1957 دولار للأوقية.. فيا ترى هيستمر الهبوط الأيام الجاية ولا ممكن يرجع يرتفع تانى
فيه شوية حاجات حصلت فى الكام يوم الأخيرة ممكن تجاوب على السؤال ده أولها الوصول الى اتفاق بين البيت الأبيض والكونجرس حوالين رفع سقف الدين الأمريكي وبكده الولايات المتحدة هتقدر توفي بالتزاماتها ومش هتتخلف عن سداد ديونها ةده طبعا هيدي قوة للدولار وسعره هيرفع وسعر الدولار لما بيرفع ايه اللى بيحصل اتوماتيك سعر الدهب بينخفض لأن العلاقة بين الدولار والدهب زي ما كل الناس عارفة علاقة عكسية يعنى كل ما الدولار بيزيد الدهب بيقل والعكس صحيح. 
كمان فيه كلام قوي على ان الفيدرالى الأمريكي ممكن يواصل سياسته المتشددة فى مكافحة التضخم ويرفع الفايدة على الدولار الأمريكي ورفع الفايدة طبعا هيخلى الدولار جاذب لأموال المستثمرين وده هيخلى الاقبال على أوات الدين الأمريكية أكبر من اللجؤ للدهب وهيقلل الطلب على المعدن النفيس ومعاه الأسعار بالتأكيد هتتراجع. 
ووصف المدير العام لشركة إدارة الأصول العملاقة "Pimco"، أسعار الدهب حاليا بأنها "مبالغ فيها"، رغم الانخفاضات الأخيرة للمعدن الأصفر، وقال أن التضخم الثابت هيخلى  من الصعب على مجلس الاحتياطي الفيدرالي خفض أسعار الفائدة في الوقت الراهن.
ولا يزال الذهب أعلى بأكتر من 20% من أدنى مستوى ليه في سبتمبر اللى فات، بعد اندفاع قاده المستثمرين اللى بيتوقعوا بيتوقعوا نهاية رفع بنك الاحتياطي الفيدرالي لأسعار الفائدة. فى الوقت اللى لسه فيه  آراء متباينة حوالين امتى هتكون البنوك المركزية قادرة على تخفيف معدلات الفائدة، وهل الاقتصادات المتقدمة هتكون قادرة على  تجنب حالات الركود. 
طب ده عن وضع الدهب عالميا.. ايه الوضع فى مصر؟ 
فى مصر سعر الدهب انخفض خلال شهر مايو بس بحوالى 300 جنيه فى الجرام الواحد وحاليا بيتباع العيار 21 بحوالى 2330 جنيه بعد ما كان ب 2630 الشهر اللى فات .. لكن سعر الدهب فى مصر مرتبط بكام حاجة بعيدا عن السعر العالمي زي العرض والطلب وسعر الدولار فى السوق السودا ودول فيهم شوية مشاكل لكن المؤكد ان الاسعار الفترة الجاية هتنخفض خصوصا مع بدء دخول الدهب مع المصريين من الخارج