قرار بريطاني مبتكر لضبط الأسعار.. إزاي مصر ممكن تطبقه
من فترة اتكلمنا عن حقيقة أزمة الأسعار في بريطانيا وإنها فعلا بتعاني من أزمة تاريخية في ارتفاع الأسعار والناس وقفت طوابير على جمعيات توزيع الطعام المجاني والكلام دا مش جديد ومنشور في المواقع البريطانية كلها بالصور اللي بتعرض نقص السلع في السوبر ماركت وارتفاع أسعار الموجود بشكل محصلش من أيام رئيس الوزراء المحافظ إدوارد هيث في السبعينات.. الحكومة البريطانية من كام ساعة خدت قرار مهم جدا لضبط الأسعار.. ياترى ايه هو القرار وهل ممكن مصر تنفذه وتخلص من أزمة ارتفاع أسعار السلع في الأسواق.
رئيس الوزراء البريطاني ريشي سوناك ليه شهور شغال يدور على حل لارتفاع أسعار السلع في البلاد واللي بقت أكبر من مقدرة البريطانيين واللي فيه منهم فكر يهاجر بلاد تانية تكون الحياة فيها رخيصة لغاية الأمور ما ترتاح في الأسعار ويرجعوا بلدهم وعلى فكرة البريطانيين قالوا دا في برامج تلفزيونية يعني احنا مش بنقول كلام وخلاص، المهم سوناك بعد شهور من التفكير والاجتماعات لقي حل مهم لأزمة ارتفاع الأسعار كل شوية.
رئيس الحكومة البريطانية قرر يقعد يتكلم مع أصحاب محلات السوبر ماركت الكبيرة والروابط بتاعة التجار والشعب هناك لفرض حدود قصوى على أسعار المواد الغذائية الأساسية زي الخبز والحليب يعني هيتفقوا يحطوا أسعار مفيش أي تاجر يزود عليها مهما كانت الأسباب.
وبحسب "صنداي تليجراف" مقترح حكومة سوناك لسه بيجهزوا فيه وإن مشاركة تجار التجزئة هتكون طواعية يعني مش هيجبر التجار يقعدوا معاه.
وقالت الصحيفة إن الأسر البريطانية بتواجه ضغوط معيشية حادة مع ارتفاع الأسعار وزيادة تكاليف الاقتراض، ودا خلى الحكومة تتدخل لخفض أسعار المستهلكين، وعشان نعرف سبب ارتفاع الأسعار في بريطانيا فالسبب الرئيسي ارتفاع أسعار الطاقة بسبب الصراع الروسي وارتفاع تكلفة زراعة المحاصيل غير تأخر وصول الامدادات بسبب عوامل مناخية عندهم.
الطريف في الأزمة زي ماقالت الصحف البريطانية إن لو سوناك نجح إنه يتوصل لاتفاق لوضع حد أقصى على أسعار المواد الغذائية الرئيسية، فبكده هيكون صاحب أكبر محاولة لإدارة أسعار السوبر ماركت منذ الضوابط اللي وضعها رئيس الوزراء المحافظ إدوارد هيث في السبعينات.
وعلى فكرة موضوع الحد الأقصى للسلع دا مش في بريطانيا بس دا كمان فرنسا عملته واتفقت مع تجار التجزئة على ضوابط للحد من زيادة أسعار بعض المنتجات الغذائية الأساسية.
جايز يكون موضوع الحد الأقصى للسلع دا حل كويس بالنسبة للأسواق في مصر وممكن االحكومة تدرسه مع التجار ويبقي لكل سلعة سعر ممنوع حد يزيد عليه خاصة إن الموضوع ممكن يريح الأسواق بشكل كبير ودي قرارات ازمة ومؤقتة.
