لو مسافر بره مصر ومحتاج دولارات.. هنقولك سياسة البنوك في توفير الدولار

  
لو حضرتك مسافر بره مصر ومحتاج دولارات لازم تعرف الأول ايه هي سياسة البنوك فى توفير العملة الصعبة للمسافرين، وليه البنوك بدأت تحط شروط وتتشدد في منح الدولار؟ وايه المبلغ اللى ممكن تحصل عليه؟ وايه اللى ممكن يحصل لو واحد طلب دولارات من البنك وثبت انه متلاعب ومش هيسافر؟ 
 

 تشديدات 

البنوك بدأت فى الفترة الأخيرة تحط قيود وتشدد من إجراءات تدبير الدولار للعملاء المسافرين خارج مصر وده بعد اكتشاف حصول بعض الناس على عملة أجنبية من غير ما يغادروا البلاد  في ظل استمرار أزمة فجوة النقد الأجنبي بين العرض والطلب في الجهاز المصرفي.
وعادة بيلجأ العملاء لشراء عملة أجنبية من البنوك قبل السفر لسداد بعض نفقاتهم خارج مصر ومن بينها أجرة التاكسي، أو المحاسبة على بعض المشروبات والأطعمة وغيرها من الأمور اللى بتحتاج فلوس كاش مع المسافر للخارج
والبنك المركزي حذر البنوك من تدبير العملة لأغراض السفر للخارج دون مغادرة البلاد، وطالب بمراجعة عينة من استخدامات البطاقات اللي تمت خارج البلاد، وده لطلبات تدبير العملة لأغراض السفر اللى حصلت من الأول من شهر ديسمبر 2022.

الحد الاقصى

وفى الكام شهر الأخيرة قللت البنوك الحد الأقصى لتدبير الدولار للعملاء المسافرين بنسبة 50% أو أكثر مع عدم وجود مرونة في رفع حد التدبير ليقتصر في بعض الأوقات على ألف دولار أو أقل بدلا من 2000 دولار، فضلا عن المرونة في رفع الحدود اللى كانت مطبقة في وقت سابق.

وبتكتفي البنوك حاليا بتدبير الدولار للمسافرين مرة واحدة في السنة ، وقبل مغادرة البلاد بـ 48 ساعة وبعد الاطلاع على ورق السفر للتأكد من حاجة العميل للدولار.

توفير الدولار للمسافرين

وبتطلب البنوك من العملاء المسافرين قبل تدبير الدولار صورة من تذكرة وتأشيرة السفر، والجواز لحسم شبهة وجود أي تلاعب من العملاء للحصول على العملة وبيعها في السوق السودا. 
وبترفض البنوك تدبير الدولار للعملاء المسافرين اللى عندهم  حسابات بالدولار، أو أي نقد أجنبي فيه رصيد إلا بعد تصفيره وسحب الرصيد منه ليبدأ بعدها البنك في التدبير، طبقا لتعليمات صادرة لموظفي الفروع في البنوك.

امتناع

و امتناع البنوك عن تدبير الدولار لأصحاب الحسابات بالنقد الأجنبي ده  إجراء مطبق من زمان، لكن طرق تفعيله بتختلف من بنك للتاني وحسب العميل والرصيد في الحساب.

وبعض البنوك بترفض تمام تدبير أي نقد أجنبي لأصحاب الحسابات بالعملات الأجنبية اللى فيها رصيد  أيا كان حجمه، لكن فيه بنوك تانية بتسمح  بالتدبير في حال كان رصيد الحساب أقل من الحد الأقصى المسموح به للتدبير.
ووقفت بعض البنوك تشغيل البطاقات الخاصة بالعميل (الائتمان والخصم المباشر) خارج مصر إلا بعد اتصال العميل بالخط الساخن الخاص بالبنك التابع ليه لتأكيد سفره وعدد الأيام حتى عودته من السفر، عشان يتمكن من تنشيط الكارت.
وكان البنك المركزي رصد سوء استخدام من بعض العملاء، وزيادة مطردة على استخدامات بطاقات الخصم المباشر والائتمان خارج مصر، أو تدبير الدولار من البنوك دون مغادرة البلاد.

توجيهات 

ووجه البنك المركزي رؤساء البنوك في كتاب دوري له، بمراجعة عينة من استخدامات البطاقات اللي تمت خارج البلاد، وكمان طلبات تدبير العملة لأغراض السفر منذ الأول من شهر ديسمبر 2022.
وكانت البنوك وخاصة الحكومية بتسمح بتدبير الدولار لغير العملاء في حدود 300 دولار فقط قبل أزمة نقص موارد النقد الأجنبي لكن حاليا فيه اجراءات مشددة لمنع التلاعب فى العملة.