ازاي تعرف الفلوس الاصليه من المضروبة وتعمل ايه لو اكتشفت انها مزورة

 
تزوير العملة دي ظاهرة عالمية مش في مصر بس ولسه من كام يوم شفنا حلقة عن عصابات تزوير الدولار بكميات ضخمة وازاي إن فيه وكالة مختصة بحماية أمن الرئيس الامريكي وهي نفسها اللي مهمتها حماية الدولار من التزوير..  وعمليات تزوير العملة من أخطر الجرائم لأنها بدمر الأسواق وبتربك الحكومات وبتسبب خسارة ضخمة للاقتصاد .. إزاي تعرف العملات السليمة من المزيفة ولو اكتشفت إنك اتخدعت وفي ايدك فلوس مزورة تعمل ايه
 

الفرق بين العملة الاصليه والمزورة

في الأول لازم تعرف إن المزورين بيركزوا على تزوير عملات الفئات الكبيرة زي ال100 وال200 جنيه عشان قيمتهم عالية   والعملتين اكتر العملات اللي الشرطة بتضبطها في الحملات الأمنية فعشان كده لازم تركز في العملات دي وأنت بتشتري أو بتبيع او في اي معاملات تجارية وكمان لازم تعرف معلومة مهمة جدا إن أي فئات عملات طالعة من ماكينة البنك بتبقى سليمة لان مكن البنوك مبرمج إنه يكشف العملات المزورة ومش بيقبلها في عمليات الإيداع اللي بتم في الماكينات يعني لو طلعت مبلغ من الماكينة اطمن إنه سليم.

ببساطة

نرجع بقي لموضوعنا وازاي تفرق بين العملات السليمة من المزيفة.. الموضوع بسيط جدا وفي كام خطوة وفي دقيقة تقدر تتأكد من سلامة الفلوس اللي معاك.
أول حاجة تعملها تتأكد من ملمس العملة لأن العملة الأصلية بيكون ملمس الورقة الخاصة بها خشن أما العملات المزيفة فبيكون ملمسها ناعم وأملس زي الورق المطبوع ولأن ورق السلمية بيكون فيه نسبة قطن ومواد تانية المزور مش بيعرف يحطها.

اختلافات 

تاني حاجه العملات الأصلية ألوانها زاهية وواضحة وصريحة غير متداخلة، أما العملات المزيفة ألوانها متداخلة وباهتة. وتالت خطوة هي إن العلامات المائية المطبوعة على الفئات المختلفة من النقود والتي بيختلف شكلها من فئة لأخرى، فالعلامة المائية المطبوعة على فئة الـ10جنيه غير المطبوعة على فئة الـ100 جنيه.

وكمان هتلاقي الفلوس الأصلية فيها خيوط لامعة ورسوم غير مكتملة، تكتمل في الضوء وبتحريكها في زوايا مختلفة، كرسمة أبو الهول، والعملات المزيفة مش هتلاقي الرسوم دي فيها.

أرقام 

كمان كل فئة من فئات العملة الأصلية بيكون مكتوب  عليها أرقام مسلسلة منسوخة 4 مرات فى أماكن مختلفة على العملة من الأمام والخلف، أما العملات المزيفة فبتكون الأرقام المكتوبة  بطريقة عشوائية.
هتلاقي  بروز عند الأرقام المكتوبة لفئة العملة وقيمتها، أما العملات المزورة فهتلاقيها من غير البروز.. وكمان الخط المزود به الورقة النقدية المطبوعة وهو ما يطلق عليه خط الضمان ده مهم جدا ودا اسرع حاجة بتكتشف بيها العملات الاصليه من المزيفة.
طيب لو اكتشفت إنك اتخدعت ومعارك فلوس مزورة اول حاجه تفتكر مين اللي اداك الفلوس دي وبعدها تطلع على اقرب قسم شرطة وتبلغ وتقول خدها منين ومتخفش مفيش عليك مسؤولية قانونية لأنك أنت اللي رايح تبلغ.