هتحل أزمة الدولار.. مصر تبدأ تنفيذ مشروعات بـ 15 مليار دولار في ليبيا

فاكرين لما قلنا مصر هتاخد نصيب الأسد في عقود إعادة الإعمار في ليبيا لاسباب كتير منها موقف مصر المساند للشعب الليبي والوقوف ضد محاولات تقسيمها ودخولها حالة حرب أهلية وبجانب كفاءة الشركات المصرية اللي أثبتت نفسها في مشروعات عملاقة كتير في القارة الأفريقية .. إيه اللي حصل وليه بنتكلم تاني على عقود اعمار ليبيا

النهاردة رئيس الاتحاد الأفريقي لمقاولي التشييد والبناء طلع وقال تصريح مهم جدا، وهو إن الشركات المصرية حصلت رسميا على عقود لإعادة إعمار ليبيا بقيمة 15 مليار دولار على مدى العام والنصف الماضية، لكن في انتظار تحسن الظروف الأمنية عشان يبدأ التنفيذ.

ولان الأمور في ليبيا بتتجه اليومين دول ناحية الهدوء  فالمشروعات على وشك الانطلاق بدليل اجتماع رئيس حكومة الوحدة، عبدالحميد الدبيبة، في طرابلس، من أسبوع مع وفد مصري رفيع المستوى ومسؤولين، لمتابعة نتائيج أعمال اللجنة المشتركة المصرية الليبية اللي بدأت أعمالها من سنتين بعد زيارته إلى القاهرة حينها ولقائه الرئيس عبد الفتاح السيسي، وجنب الاجتماع دا كان فيه اجتماع مع ممثلي الشركات المصرية اللي هتشتغل في ليبيا ودا معناه إن المشروعات هتطلق في أقرب وقت.
المكتب الإعلامي لرئيس حكومة الوحدة الليبية أكد ده وقال إن الوفد المصري ناقش مع ممثلين لحكومة الوحدة الوطنية، في لقاء منفصل، انطلاق المشروعات اللي هتنفذها ائتلاف الشركات المصرية، بعد تسلّم مواقع الأعمال وإنهاء إجراءات العمالة، وتجهيز المقارّ الخاصة بهم، إضافة إلى مناقشة حزمة من المشاريع في مجال الكهرباء والبنية التحتية وده بياكد إن القرار اتاخد فعلا ببدأ المشروعات .

ولان فيه شركات كتير حكومية في العقود فدا كفيل يحل أزمة الدولار في مصر لو بدأت المشروعات دلوقتي، وغير المشروعات مش عايزين ننسى عودة ملايين العمالة المصرية واللي كانت في ليبيا قبل الحرب واللي كانت تحويلاتها أكتر من تحويلات العمالة المصرية في الخليج وكانت ليبيا أفضل كمقصد للعمالة المصرية من الخليج بسبب قرب المسافة وتييسير إجراءات الدخول ولو فاكرين المصريين كانوا بيدخلوا ليبيا بالبطاقة الشخصية .