«الحبتور» يغني مصر عن القروض

مصر من امبارح بتتكلم على مشروع الحبتور العملاق اللي هيقلب مصر ويخليها مش محتاجة تاخد قروض من الخارج.. ايوا دا اللي حصل والراجل بيتكلم جد.. مين هو الحبتور وليه بيتكلم بثقة كده وايه هو المشروع اللي هيغير موازين الاقتصاد المصري
 

مشروع الحبتور في مصر

خلف الحبتور، كتير مننا سمع عنه قبل كده وهو رجل الأعمال الإماراتي الشهير ورئيس مجلس إدارة مجموعة الحبتور، والحقيقة الراجل دا عنده حب كبير لمصر ودايما يشيد باقتصادها ومقتنع ان مصر هتنطلق بشكل كبير وعندها كل مقومات الاستثمار الناجح عشان كده شركاته بتعمل مشروعات كتير  في مصر .
الحبتور طلع امبارح واتكلم عن مصر في أحد البرامج الفضائية وأشاد بالمشروعات القومية اللي يتنفذها مصر، خاصة في مجال البنية التحتية، والمشروعات الزراعية، ومنها التوسع في زراعات القمح.
ورجل الأعمال الإماراتي، قال حاجة مهمة جدا وهي إنه شاف مشروعات قومية ضخمة بيتم تنفيذها في مصر، خاصة الزراعية منها لأنها أولوية، وتُعتبر مؤشر على تفوق مصر على بعض الدول الأوروبية، خاصة التوسع في زراعة القمح، وإن المستثمر يبحث عن سرعة اتخاذ القرار لدى المسؤولين لتشجيعه والجملة الأخيرة دي تتاقل بالدهب وسر تفوق دول الخليج.

رجل الأعمال خلف الحبتور.. وكلمة السر 

وطرح  الحبتور رؤيته لانطلاق الاقتصاد المصري وكلمة السر في ازدهار الاقتصاد الإماراتي وهي  إن الحكومة المصرية لازم تستعين بأصحاب الخبرات الناجحين في سوق الأعمال، ومش الأكاديميين لإنجاح الأفكار، لأن الإدارة الناجحة بتعتمد على أصحاب الخبرات اللي مارسوا العمل في الأسواق .

ومن  جهة نظر  الحبتور  فتطوير البنية التحتية وشبكة النقل في مصر وإنشاء الكثير من وسائل النقل زي لقطار الكهربائي،  والمونوريل عامل رئيسي لجذب الاستثمار بأنحاء البلاد.

ونرجع بقى لمشروع خلف الحبتور، واللي كشف عنه في لقائه التلفزيوني، وقال إنه اتقدم وطرح عدة مشروعات لتنفيذها داخل مصر من أجل جذب الاستثمارات الأجنبية، وقال إنه أعد دراسة وضعها أمام مسؤولين مصريين لانشاء مشروع من الكلية الحربية حتى آخر شارع صلاح سالم بمصر الجديدة، هيحول هذا الشارع إلى جنة الدنيا على الأرض .

أحسن من باريس 

وقال الحبتور نصا إذا صار هذا المشروع يعين لو اتعمل هيكون أكبر بوابة وأهم من برلين ولندن وأكسفورد .. والراجل شايف إن مصر الخير فيها كل شيء ما تحتاج لشيء، إذا عملت هذا المشروع ما تحتاج لقروض، وتقدر مصر تسدد قروضها دي كلام الحبتور واللي قال إن تكلفة المشروع مش هتقل عن 6 مليار دولار ولسه في انتظار رد المسؤولين واللي بيدرسوا المشروع بالتفصيل.

الخلاصة في كلام الحبتور إن مصر بقت جاذبة للاستثمار بفضل مشروعات البنية التحتية اللي اشتغلت عليها مصر كويس جدا ومكانش حد هيجي يعمل مشروع عندك من غير بنية أساسية يعني البلد كانت بتتبني صح من أول وجديد وكمان خلاص كلام الحبتور إن بالعلم وأصحاب الخبرة والأفكار الخلاقة البلاد بتنطلق..   وبالسرعة والدقة والشفافية بيجي الاستثمار.