سوق الدهب في انتظار القرار الصعب
بعد الدولار الدهب قى نجم الترند في مصر وامكن في العالم، عشان نسب الاقبال الكبيرة عليه لأنه ملاذ أمن في الأزمات الكبيرة وتقلبات أسعار العملات، يعني لو فيه مصيبة يبقي الدهب هو الحل الأفضل عشان تحفظ فلوسك من الضياع أو قيمتها تقل، وفي مصر الدهب قفز قفزات تاريخية لأول مرة لأسباب كتير والمصريين وقفوا طوابير على محلات الصاغة عشان يجمدوا مدخراتهم بعد أخبار التعويم وتقليل قيمة الجنيه المصري ولان الدهب بيحتفظ بقيمته وبيحقق ربح كمان.. الدهب رايح على فين في مصر وايه الحدث المهم اللي مستنيه السوق وبناء عليه سعره هيستقر أو يستمر في الارتفاع.
سعر الدولار
في الغالب الدهب والدولار كل واحد فيهم بيحدد سعر التاني، وماشيين دايما عكس بعض يعني الدولار لو زاد الدهب سعره بينزل والعكس صحيح لو الدولار نزل الدهب بيرفع ودي قاعدة السوق الاقتصادية لكن في مصر كانت الحالة خاصة شوية لأن الدهب كان مع نفسه وملهوش علاقة بالدولار والطلب كان هو اللي بيحدد سعره وعشان المعروض كان قليل شفنا الأسعار إزاي طلعت في العالي جدا.
مهما كان الدهب بيتأثر بالوضع الاقتصادي وهيستمر في حالة الفوضى لغاية مايوصل لنقطة الاستقرار ودي هتتحقق غالبا بعد مراجعة صندوق النقد والقرارات اللي هتسبقها سواء تعويم أو توافر الدولار وتقرير المراجعة بتاع الصندوق واللي هيفرق كتير في قصة استقرار أسعار الدهب، يعني لو الدولار اتوفر وسعره قل الدهب المفروض ينزل وبنقول المفروض لأن في مصر السوق ليها اهتمامات تانية ولو مشكلة الدولار متحلتش ومحصلش اتفاق مع الصندوق على الشريحة التانية معناه إن الدولار سعره هيزيد قدام الجنيه وساعتها الناس هتجري تااني على الدهب ومع ارتفاع الطلب الأسعار هتولع مرة تانية.
استقرار اسعار الذهب
الخلاصة إن سوق الدهب مش هيستقر غير لو استقر الجنيه ومدخلت في تعويم تاني لأن الناس ساعتها هتضمن ان فلوسها ومدخراتها قيمتها مش هتقل أو تنقص وهتخف الطلب على الدهب.
