عفاريت الدهب.. بانكير يكشف سر ارتفاع الأسعار في الصاغة

كل حاجة في الدنيا فيها عقل ومنطق واللي بيحصل في سوق الدهب دا مش طبيعي أبدا، ومتصدقش اللي يقولك زيادة الطلب هو اللي بيرفع الأسعار لأن الناس مش هي اللي بتطلب.. ايه اللي بيحصل بالظبط ومين الأشباح اللي بيتحكموا في سوق الدهب والصاغة وجركة البيع والشراء، مين اللي من مصلحته يكسب في الجرام 500 لغاية ألف جنيه ويعملوا ثروات.

قبل كده وفي نفس المكان هنا قلنا مهما زاد المعروض فيه مافيا من مصلحتها مايكونش فيه دهب في السوق، وعشان كده بيلموه أول بأول عشان يعطشوا السوق ويرفعوا الأسعار ولما تيجي تسأل يقولك حكم السوق والناس بتشتري والدهب المعروض بيقل,

الحقيقة مش دا اللي بيحصل بالظبط لأنه بالعقل كده الناس اللي معاها فلوس وعايزة تستمثر في الدهب طبيعي انها اشترت خلاص في الشهور الكتيرة اللي فاتت لما كان الطلب عليه طوابير ، وأكيد الناس مش هتشتري كل يوم دهب يعني لأن فلوسهم خلصت.. أومال مين اللي بيشتري الكميات دي كلها.. القاعدة بتقول ابحث عن المستفيد وهتلاقيه هو سبب الأزمة.

امبارح بانكير سألت تجار دهب في مناطق شعبية ليه رجع يزيد قالك كلمة واحدة بناخده غالي من التجار الكبار اللي بيوزعوا ودا اللي قلناه زمان ونحب نفكركم بكلامنا لما قلنا إن فيه كام عيلة هما اللي مسيطرين على السوق وبقوا مليارديرات من وراء مكاسب الدهب في الشهور اللي فاتت بعد القفزة القياسية في الأسعار واللي خلتهم يعملوا ثروات ضخمة.

طبعا بالعقل كده تجار الدهب الكبار بيلموا المعروض أول بأول وكمان ساعات بيلموه قبل ماينزل السوق ويوزعوا هما براحتكم ويفرضوا سعرهم على بقية التجار، وبعدها يتحججوا بالعرض والطلب والدولار وشح المعروض وحاجات كتير حفظناها وبقت مكشوفة.
زي ماقلنا قبل كده هنقول تاني طول مافيه ناس بتتحكم في كميات الدهب اللي داخلة السوق الأسعار مش هتنزل ولا السوق هيستقر حتى لو الدهب بقى على بطاقة التموين وبيتوزع في المدارس مجانا، وده اللي حذر منه بانكير قبل كده ولسه بتحذر تاني من ارتفاع جنوني في الأسعار غضب عن الناس والحكومة والأسواق والمبادرات