3 ضربات موجعة لدولار السوق السودا.. لسه هينزل تاني
اللي متابع اللى بيحصل فى السوق السودا للدولار هيلاحظ ان فيه انهيار كبير لسعر العملة الأمريكية وكل يوم السعر بينزل وبعد ما كان المؤشر فى صعود قوي وعدا ال 40 جنيه حاليا السعر بيدور حوالين من 35 الى 36 جنيه وأغلب اللى بيتعاملوا بيقولوا ان لسه كمان فيه نزول.. فيا ترى ده سببه ايه ؟ وايه علاقة ده بالكلام ان مفيش تعويم تانى؟
خلال آخر 5 ايام سقط دولار السوق السوداء في مربع الخسائر العنيفة، مع ارتفاع المعروض بنسب كبيرة واشتكى متعاملين على الصفحات اللى بتابع أسعار الصرف في مصر، من عدم وجود تنفيذ فعلي وتوقف السوق عن العمل مع استمرار تراجع أسعار الصرف من مستويات كانت قد اقتربت من 42 جنيهاً إلى أقل من 36 جنيه في بعض التعاملات الأخيرة.
وده فى الوقت اللي استقرت فيه أسعار الصرف في السوق الرسمية، وسجل سعر صرف الدولار فى البنك الأهلي وبنك مصر مستوى 30.75 جنيه للشراء، و 30.85 جنيه للبيع، وفي البنك التجاري الدولي - مصر، سجل سعر صرف الدولار حوالى 30.85 جنيه للشراء، و 30.95 جنيه للبيع.
وربط متعاملين في سوق الصرف بين خسائر الدولار في السوق السوداء، وتحركات حكومية جديدة سواء في سوق الدهب، أو فيما يتعلق ببرنامج الطروحات بعد ما شهدت الأيام اللى فاتت الإعلان عن تنفيذ صفقتين ضمن برنامج الطروحات الحكومية وده بييشير إلى انفراجة وشيكة في الأزمة الناجمة عن نقص الدولار في السوق الرسمية.
وقررت الحكومة، إعفاء الدهب الوارد بصحبة الوافدين من الرسوم والجمارك باستثناء ضريبة القيمة المضافة اللى بتحتسب على المصنعية بس، وده ساهم في فك الارتباط بين أسعار المعدن النفيس في السوق وأسعار صرف الدولار في السوق السوداء.
وبالتوازي مع التحركات الحكومية، أطلقت بعض القطاعات التجارية دعوات لمقاطعة التعامل مع السوق الموازي للدولار وفي مقدمتها تجار السيارات، ودعت شعبة تجار المحاجر بالغرفة التجارية بالقاهرة لوقف الاستيراد لمدة شهر لتقليل الضغط على الدولار.
وفي بيان رسمي ليها دعت رابطة تجار السيارات، جميع المستوردين، والوكلاء، والموزعين المتعاملين في سوق السيارات المحلية، بالتوقف عن شراء الدولار من السوق السوداء، من خلال حملة تم إطلاقها تحت عنوان "ادعم الجنيه عملة بلدك".
وطالبت الرابطة في خطاب رسمي جميع العاملين في مجال سوق السيارات بعدم المساهمة في خلق حالة الطلب على الدولار لمدة شهر واحد، والتوقف عن التعامل بالنقد الأجنبي، في الفترة من 15 مايو حتى منتصف الشهر الجاية، لغاية ما تستقر الأوضاع.
وأعلنت شعبة المحاجر والرخام بالغرفة التجارية بالقاهرة، إطلاق مبادرة لوقف استيراد الرخام والجرانيت من الخارج لمدة شهر، لتقليل الضغط على الدولار.
ومن أيام قليلة أعلنت شركة الأهلي فاروس للترويج وتغطية الاكتتاب، إتمام أول عملية استحواذ ضمن برنامج الطروحات الحكومية لشركة الأصباغ الوطنية الإماراتية على "باكين" بقيمة 24.9 مليون دولار.
وأعلنت إدارة البورصة المصرية، الأحد الماضي تنفيذ بيع حصة جديدة من شركة المصرية للاتصالات. وأوضحت أنه تم تنفيذ بيع عدد 162.171 مليون سهم بقيمة إجمالية 3.747 مليار جنيه.
وكل الاجراءات دي مع تأكيد على ان مفيش تعويم للجنيه على المدى القريب ساهمت فى انهيار السوق الموازية والمضاربة على الدولار تراجعت بشكل واضح، ومتوقع مزيد من الهبوط لسعر صرف العملة الأمريكية فى السوق السودا خلال الفترة الجاية.
