أخطر 28 ساعة في سوق الدهب .. إيه الي هيحصل خلال اليومين الجايين؟

 
مفيش حد في مصر متابع سوق الدهب الا وبيضرب كف على كف من اللى بيحصل في الأسعار وازاى سعر جرام الدهب في مصر بقا بيتباع أعلى من سعره العالمي بأكتر من 700 جنيه .. والكل بيسال هي الأوضاع هتستمر كده لحد امتى؟ وليه الحكومة مش بتتدخل وتوقف الجنون اللى وصل بسعر جرام الدهب لـ 2900 جنيه عيار21.. وفى الأيام الأخيرة بدأنا نشوف حاجات تقول ان فيه تحركات قوية هتظهر في سوق الدهب الأيام الجاية.. فيا ترى ايه اللى هيحصل ؟ وايه تأثيره على أسعار المعدن النفيس؟
 
امبارح وزير المالية محمد معيط كان في مداخلة مع الإعلامي عمرو أديب عشان يرد على أهم الأسئلة اللى بتشغل بال المواطنين في الفترة الأخيرة ولما اتسأل الوزير عن المقترح اللى تم طرحه مؤخرا واللي بيقضي بالسماح للمصريين في الخارج بالدخول بكميات من الدهب تكون معفاة من الضرائب والرسوم عشان نحل الأزمة الموجودة في مصر واللى تجار الدهب بيقولوا ان بسبب زيادة الطلب وقلة المعروض.. الوزير أعلن أنه هيتم حسم موقف الحكومة في مقترح استيراد الدهب من الخارج بالنسبة للمصريين العاملين في الخارج والسماح بدخوله إلى مصر دون سداد أية رسوم أو جمارك، خلال خلال 48 ساعة.
وفى وقت سابق كشف ناجي فرج، مستشار وزير التموين لشؤون صناعة الذهب، تفاصيل اقتراح بإعفاء المشغولات الذهبية الخاصة بالمواطن القادم من الخارج من الجمارك.. وقال ان الكميات اللى ممكن  إعفاء المواطنين من دفع الجمارك عليها تتراوح من 100 إلى 150 جرامًا من المعدن الأصفر.
مستشار وزير التموين قال ان  فيه فجوة في الدهب المعروض حاليا بالأسواق المصرية، وقال ان فيه  نقص بسبب تكالب المواطنين على شراء السبائك والجنيهات الدهب.

وأكد ان دخول ذهب من الخارج هيسهم في استقرار السوق والأسعار ويرفع الحصيلة الدولارية لأن الدهب عملة معترف بيها في كل دول العالم وكشف أن سوق الدهب بيبيع ما بين 200 و300 كيلو سبايك وجنيهات دهب.
وطبعا مهلة ال 48 ساعة اللى اعلن عنها الوزير هتعمل انقلاب في سوق الدهب لان مقترح دخول الدهب من الخارج هيؤدي الى انخفاض كبير جدا في أسعار الدهب خصوصا لو عرفنا انك لو اشتريت دهب من السعودية او الكويت او الامارات او قطر او اى بلد عربي هتلاقي فرق سعر في الجرام الواحد اكتر من 700 جنيه وده الفرق بين السعر المحلى والسعر العالمي للدهب.