لو مصر توقفت عن تحرير سعر الصرف اية اللي هايحصل؟

مش في ناس كتير بتشتكي من تعويم الجنيه.. وتركه لمسألة العرض والطلب.. طيب يا ترى.. اية اللي هايحصل لمصر لو توقفت تمامًا عن تحرير سعر الصرف.

الإجابة كانت عند المؤسسة المالية الكبرى.. جولدمان ساكس، واللي أكدت أن في حالة توقف مصر لتحرير سعر الصرف فدا هايؤدي ..لانخفاض الاستثمار الأجنبي المباشر بمقدار كبير بعكس لو استمر تحرير سعر الصرف.

وجولدمان ساكس قالت كمان أنه في حال توقف مصر عن اتباع سياسة سعر الصرف المرن فمن المتوقع أن يصل الاستثمار الأجنبي المباشر لـ 9 مليار دولار سنويا خلال 3 سنين الجاية، لكن لو في حالة استمرار مصر في اتخاذ خطوة مرونة سعر الصرف فالاستثمارات هاتوصل في نفس المدة لـ 14 مليار دولار.

وكمان هاتنخفض الاحتياطيات النقدية بشكل حاد في حال عدم الالتزام بشكل كامل بمرونة سعر الصرف، واللى  ممكن توصل لـ 13 مليار دولار بحلول السنة المالية 2025-2026 بافتراض عدم تضييق عجز الحساب الجاري.

بينما التزام مصر بمرونة سعر الصرف، من شأنه أنه يدعم التصدير والقدرة التنافسية على المدى الطويل ومساعدة مصر على التكيف على المدى القريب وتعزيز التبادل التجاري.

والكلام دا أساسه أن مصر في حالة السعر الثابت غير المرن.. فهي مابتحطش سعر عادل للعملة ودا بيدعم المضاربة في الأسواق وتوغل السوق السودا بينما في حالة تحرير العملة فدا بيخليها في مقدارها الحقيقي أمام العملات التانية وبيخفف من عبء العجز التجاري عن الحكومة.