ضربة قوية.. الحكومة تواجه المحتكرين وجشع التجار بإجراءات رادعة
يا ترى الحكومة هتعمل ايه مع المحتكرين؟ وايه العقوبات اللي ممكن تفرضها على التجار الجشعين؟ وامتى الأسواق ممكن تتظبط والأسعار ترجع زي زمان؟
كل الناس في مصر بتشتكي حاليا من
ارتفاع أسعار السلع والخدمات وتقريبا مفيش حد في مصر الا وبيشتكي من ارتفاع الأسعار وخصوصا السلع الغذائية اللي بيحتاجها المواطن في حياته بشكل يومي زي الرز والسكر واللحوم والفراخ.
واللي حصل في أزمة الفراخ تحديدا كشف اننا عندنا أزمة ضمير وجشع من التجار اللي بيتحكموا في السوق وبيحددوا أسعار السلع على مزاجهم.. والفراخ اللي الكيلو بتاعها وصل لحوالي ٩٥ جنيه في الأسواق نزل اكتر من ٢٠ %بمجرد طرح فراخ مستوردة في الأسواق يعني الاسعار اللي كان بيبيع بيها التجار والمربين مش حقيقية وفيه زيادات مش طبيعية.
طب الحكومة هتعمل ايه عشان تواجه جشع التجار والمحتكرين؟
الحكومة شغالة في اتجاهين الاول اي سلعة هتزيد بشكل مش طبيعي هيتم فتح باب الاستيراد من الخارج لتوفير السلعة دي عشان يكون فيه منافسة والسعر ينزل
الحاجة التانية هيكون فيه عقوبات مغلظة وهيتم تطبيق القانون بقوة على كل من تسول ليه نفسه التلاعب بقوت الناس وقانون العقوبات وقانون حماية المستهلك فيهم مواد كتيرة جدا فيها عقوبات قاسية جدا بتوصل للحبس ١٠ سنيين وغرامات بملايين الجنيهات ضد كل محتكر أو تاجر جشع معندوش ضمير
