يعني اية سعر الصرف؟ وأية أنواعه؟؟ وامتى بنلجأ له؟

وأنت قاعد قدام التليفزيون الساعة 9 .. وبتسمع الفقرة الاقتصادية.. هاتلاقي جملة كدا بتتكرر كتير.. وهي سعر الصرف.. وجملة كمان زي .. تحرير سعر الصرف أو التعويم.. وأنت قاعد مبلم ومش عارف لا معنى دا ولا معنى دا.

بس دا مش معناه أننا نسيبك كدا مش فاهم يعني اية سعر الصرف؟

خليك مركز معانا علشان اللي هاتسمعه بسيط وسهل ومافيهوش أي تعقيد

أولًا.. لازم تعرف أن أي عملة في الدنيا ليها "قيمة" واللي بيحدد "القيمة" دي.. حاجات منها "العرض والطلب" أمام العملات الأجنبية.. وطبعًا إحنا عارفين أن العملة الأجنبيه الأولى في العالم هي "الدولار".. وهنا بقى يبدأ القياس.. يعني لو صادرات البلد أكبر من وارداتها هاتكون قيمة "ألجنيه" كويسة.. لأنك مابتستنزفش المخزون بتاعك من "العملة الأجنبية" في الاستيراد.. بل العكس الدول هي اللي بتشتري منك وبالتالي قيمة عملتك بتزيد.. ودا أسمه "سعر الصرف المرن".

قبل ما ننقل للنقطة التانية.. في أكيد واحد من اللي بيشوفنا بيسأل نفسه ويقول ويا ترى إحنا لية قيمة عملتنا في النازل قدام الدولار.

المسألة بسيطة جدًا.. ودا لأن عوامل القوة اللي بترفع من "قيمة" عملتك مش موجودة

واللي منها أن حجم الصادارت عندك مش كبير والاستيراد كبير.. وبالتالي في فجوة بين الاتنين.. ودا عامل مهم بيقلل من "قيمة" عملتك.. لأنك بتستورد بالعملة الأجنبية مش المحلية.. وبالتالي الجنيه بينزل والدولار بيطلع في مؤشر سوق المال الخاص بيك.

وكمان مصر حتى الآن دولة مش منتجة ومحتاجة تشتري من برة بالعملة الأجنبية.. ودا برضوا بيخلي عندك عجز ودا كمان عامل في انخفاض قيمة العملة

نيجي بقى للنوع اللي كنا ماشيين عليه لفترة طويلة جدًا.. وهي مسألة "تثبيت سعر الصرف".

ودي جزئية بسيطة وسهلة جدًا.. ومعناه.. أن البنك المركزي عندك في الدولة يحط هو سعر محدد للصرف بين العملة المحلية والأجنبية.. ومايسيبش الموضوع للعرض والطلب

ودا للأمانة بيكون مصدر معاناة كبير للدولة.. لأن مابيعكسش قيمة العملة خالص.. يعني ممكن الدولار يكون 30 جنيه.. والبنك المركزي عامل سعر صرف وهو 25 جنيه.. والفرق بتدفعه الدولة.

يعني ببساطة كدا.. تثبيت سعر الصرف .. معناه أن الدولة تدعم المواطن بالفرق بين سعر الصرف المعلن والسعر الحقيقي... يعني بتديك السلعة بأقل من قيمتها.. وهي تشيل الباقي.. زي البنزين.. اللي زاد سعره في كل دول العالم ولسه حتى الآن بتاخده بالسعر القديم والدولة بتشيل الباقي.