موعد تراجع أسعار اللحوم والدواجن
يا ترى الفراخ واللحوم سعرها ممكن ينزل امتى؟ وازاي الحكومة بتفكر في وقف الارتفاع الجنوني في أسعار البروتين؟ وهل أزمة الأعلاف والتصدير ليها دور في اللى بيحصل ولا لأ؟ وايه الموقف بالنسبة لأسعار كتير من السلع قبل شهر رمضان؟
خبر سار قبل شهر رمضان.. اعرف اللحوم والفراخ سعرها هينزل امتى؟
اسعار اللحوم والفراخ خرجت عن السيطرة فى الفترة الأخيرة وسعر كيلو اللحمة وصل لمستويات كتير من المواطنين ما بقوش يقدروا عليه وحتى الفراخ اللى الناس كانت بتعتمد عليها كبديل أرخص أسعارها هي كمان طارت فى السما وعشان كده الحكومة حاليا مشغولة بضبط أسعار الدواجن واللحوم من خلال ضخ كميات إضافية في منافذها بجانب الإفراجات عن الأعلاف بالموانئ المصرية عشان تحط نهاية للأزمة قبل شهر رمضان المبارك أعاده الله علينا وعليكم بالخير واليمن والبركات.
وفى الكام يوم الأخيرة تم الافراج عن كميات تتجاوز 2 مليون طن خامات أعلاف في الموانئ المصرية خلال الفترة من نص أكتوبر ولغاية 25 يناير وده بعد شكاوي كتير من مربي الدواجن عن ارتفاع اسعار الاعلاف وعدم توافرها فى الأسواق .. وطبعا الكميات اللي تم الإفراج عنها تكفي لاحتياجات السوق المحلي والمنتجين .
ووافقت الحكومة كمان على تخصيص مبلغ 44 مليون دولار لدخول مستلزمات الأعلاف بهدف الحفاظ على استقرار السوق وده هينعكس بشكل ايجابي على أسعار الدواجن واللحوم والبيض في الشهر الجاي
وتم تشكيل لجنة مشتركة بين وزارة الزراعة ووزارة التموين لمراجعة المعروض والإفراجات من الأعلاف لتوفير كل احتياجات المربين خصوصا وان شعبة مربي الدزواجن كانت قالت ان فيه عدد من المربين خرجوا من السوق بسبب الأزمة اللى اشتعلت بعد قفل باب الاستيراد خلال ازمة نقص الدولار
واللجنة اللى تم تشكيلها من الوزارتين اللجنة هترصد وتتابع أي مخالفات تتمثل في رفع الأسعار بشكل غير مبرر واتخاذ إجراءات قانونية ضد المخالف بشكل رادع
ومتوقع باذن الله انخفاض أسعار اللحوم والدواجن من خلال زيادة المعروض عبر منافذ الدولة سواء وزارة التموين والمجمعات الاستهلاكية أو منافذ وزارة الزراعة المصرية فى أكتر 243 منفذا ثابت و30 منفذ متنقل تابعة لوزارة الزراعة وبتضم كل السلع الأساسية اللي يحتاجها المستهلك المصري بأسعار مناسبة.
