هل يواصلان الارتفاع..الدولار والذهب ينتظران أخطر 7 أيام في عام 2022
بدأنا نفهم.. معركة الوعي تحسم الصراع بين المصريين ومافيا الدهب والدولار وتجار الأزمات في المثل المصري قالوا "رب ضارة نافعة" والحاجة أم الاختراع.. والجوع يعلم الصيد .. والصراحة 2022 علمت المصريين اللي ماتعلمهوش طول عمرهم وبنقصد طبعا في مجال الاقتصاد والمصري العادي عرف يعني إيه عملات وسعر الصرف وعرف يعني أيه تضخم وركود وسلاسل امداد وسعر الفايدة والفدرالي وأزمة الروبل واللي بيحصل في سوق الدهب.. ياترى ازاي معركة الوعي حسمت الأمور وسهلت على الحكومة ضبط الأسواق وصعبّت على تجار الأزمات استغلال المواطنين؟.
الذهب في مصر
في العالم الغني بأوروبا وأمريكا مفيش حاجة اسمها سلعة ترتفع من غير المواطن ما يكون متوقع انها هترتفع وكمان بيتوقع نسبة الزيادة، وعارف أسباب ارتفاع السعر والسبب هيستمر لحد امتى وإيه البديل وهيوفق أوضاعه ازاي مع السعر الجديد، يعني المواطن هناك عنده وعي وثقافة سوق بتحصنه ضد أي محاولة للتلاعب.. ولو حصل أي استغلال المواطن اللي هو المستهلك بيدخل فورا ويبلغ وياخد حقه وهو واقف..
عارفين في مصر مشكلتنا الكبيرة إيه.. السلبية إنك تقبل الوضع الغلط وتقول أنا مالي وبترضى إنه يتم استغلالك ومن غير ماتحرك ساكن رغم الحكومة نفسها بتقولك يامواطن لو تاجر رفع سعر السلعة من غير داعي امسك موبايلك وبلغ عليه أنت كده مش بتأذيه بالعكس انت بتحمي نفسك وولادك والمجتمع من انسان بيستغلك وبتدي لغيره درس عشان ما يعملش كده... وخلينا نتكلم بصراحة كان زبون أو أنت كمواطن اتجادلت كام مرة مع صاحب السوبر ماركت اللي متعود تشتري منه او الفكهاني وبتاع الخضار لما لقيت الأسعار بتغلي وهل في مرة فكرت تبلغ عنه عشان الأسعار المبالغ فيها.. كل ما في الأمر هتسأله الحاجة رفعت ليه هيقولك عشان الدولار حتى لو السلعة ملهاش علاقة بالدولار إطلاقا..
بس خلينا منصفين بردوا إن المصريين ابتدى يبقى عندهم وعي وثقافة سوق ويفهموا في التفاصيل وكمان بقوا يتحركوا بإيجابية ويبلغوا عن تجار الأزمات والمحتكرين وفوق ده كله بقت عندنا ثقافة الترشيد واشتري على قدي من الحاجة اللي بيغلى سعرها.
الدولار
طيب أنا إنسان عادي اعرف ازاي إن اللحمة رفعت بدون داعي أو السكر أو اللبن وغيرها.. شوف أسهل حاجة عزيزي المواطن انك تدخل على صفحات الوزارات الرسمية والأسواق على الانترنت وتعرف الأسعار كام في الجملة والقطاعي ومتوسط السعر عندك وصدقني لو تابعت الموضوع ده كام يوم ورا بعض هتعرف الدنيا ماشية إزاي.. في النهاية ياحضرات محدش بيضحك عليه غير المغفل ولازم تعرف حقوقك وتدافع عنها.
