نكشف لغز ألاوفر برايس في مصر..والسر الخفي لارتفاع أسعار السيارات الجنوني

هو مين اللي بيحمي مافيا السيارات في مصر؟ وليه الحكومة سايبة تجار العربيات يعملوا اللى هما عاوزينوا ومفي عقاب ولا ردع؟ وازاي العربيات بتتباع باكتر من سعرها 100 %؟

فيه حاجات غريبة جدا بتحصل فى سوق السيارات فى مصر، ومحدش عارف ليه الحكومة سايبة الدنيا تمشي كده ومش بتتدخل، تخيل حضرتك عاوز تشترى عربية جديدة ورحت لشركة من شركات العربيات عشان تدفع المقدم وتاخد معاد تستلم فيه العربية أول حاجة هتلاقي سعر العربية مضروب فى اتنين يعنى مثلا لو العربية فى اى حتة تانية فى العالم بتتباع بـما يوازى 400 الف جنيه مثلا هتلاقي المعرض بيقولك سعرها 800 الف وهتستلمها بعد 3 شهور وممكن تدفع المقدم وتروح عشان تستلمها فى المعاد تلاقي المعرض بيغير السعر ومسعر الدولار بأزيد من سعره فى السوق بأكتر من 30% زي ما هو موجود دلوقتى وفيه توكيلات مسعرة الدولار على انه ب 30 جنيه وبتخير الحاجزين ما بين انهم يدفعوا فرق السعر او ياخدوا اللى دفعوه وعليه فايدة 18%. 
ورغم ان المتضررين لجأوا الى جهاز حماية المستهلك لكن لسه الزمة مستمرة وما اتحلتش وغالبا الناس فى الاخر هتقبل بشروط الشركة او هتاخد الفلوس اللى دفعتها رغم ان العقد شريعة المكتعاقدين والشركة المفروض ملزمة توفر السلعة المتعاقد عليها لأن التاخير فى التسليم هو مسئولية الشركة والعميل مالوش دعوة. 
اللى بيحصل فى سوق السيارات فى مصر خلا ناس تتكلم عن مافيا بتتحكم فى السوق وناس مسئولة بتستفيد من اللى بيحصل خصوصا ان الأزمة بتتفاقم كل شوية ومفيش اى تدخل بيحصل والناس بتبقا مش عارفة تعمل ايه ولا تروح لفين رغم ان قانون حماية المستهلك المفروض انه بيحمى العملاء ويحافظ على حقوقهم وياخد اجراءات قوية ضد أى شركة يثبت تلاعبها فى الاسعار.