علشان نفهم.. ليه المركزي أصدر قرار بوقف مستندات التحصيل.. وازاي يقلل الاستدانة من الخارج
منذ اعلان البنك المركزي المصري قراره الشجاع الخاص بتنظيم عمليات الاستيراد ووقف التعامل بمستندات التحصيل، وبدء العمل باالاعتمادات المستندية فقط ، أثيرت حالة كبيرة من الجدل داخل الأوساط الاقتصادية وتبنت تجمعات رجال الأعمال والمستثمرين حملات ممنهجة للهجوم على القرار وحاولوا ايهام الجميع أن القرار ضد مصلحة الوطن وأنه سيؤثر على الانتاج ، وهو ما واجهه المركزي بحسم مؤكدا أن القرار يقضى على فوضى الاستيراد وكذلك التلاعب فى فواتير سداد الجمارك ويحفظ حقوق الدولة بالاضافة الى انه يعطي المواطن جودة أعلى فى البضائع المستوردة.
ولكي نفهم القصة بالكامل وما هي دوافع البنك المركزي من القرارات الأخيرة وتداعياتها على الاقتصاد الوطنى ودورها فى حماية مصر من غول التضخم الذي يلتهم كبرى الاقتصادات فى العالم بالاضافة الى تقليل حجم الاستدانة من النقد الأجنبي.. خلونا نتكلم ببساطة ونسأل كام سؤال يوضحوا للناس الرؤية بالكامل:
عايز أسأل شوية أسئلة للناس اللي بتنقد البنك المركزي في قراراه الخاص بتنظيم عمليات الاستيراد ووقف التعامل بمستندات التحصيل اللي هي كانت تخلي عملية الاستيراد تتم من خلال التعامل المباشر بين المستورد والمصدر الاجنبي وبينها وبين الاعتمادات المستندية اللي حشرت البنوك في النص..
- على مدار السنوات الخمس الماضية هل حضراتكم شوفتوا البنك المركزي المصري عمال ياخد قرارات ضد مصلحة البلد وضد المواطن وشغال سياسة نقدية شوية من الشرق وشوية من الغرب خلى التضخم وصل 50 ولا 100 ولا 5000 زي مهو موجود ف دولة تانية منها اللي قريب مننا..؟
- هل متخيلين يعني الناس في البنك المركزي قاعدين فاضيين شايفين الدنيا هادية ف الكوكب ف قالوا لما نضرب كرسي في الكلوب كده عشان احنا عايزين نتشهر مثلا ف ناخد القرار ده ..؟
- هل اللي بينتقد ده وهو قاعد تحت البطانية ومشغل الدفاية معتقد ان الناس البنك المركزي بيقعدوا قعدة كده مع بعض خمسة ستة ويجيوا واخدين القرار ضاربينه في وش الناس ع الصبح عشان يعملوا تريند ويجيبوا لايكات ..؟
هل تعلم أن البنك المركزي المصري فيه أكثر من 300 باحث اقتصادي ومتخصص على أعلى مستوى في العالم من التعليم والكفاءة والخبرات ولديهم شهادات سواء تعليمية أو تدريبية من أكبر الجامعات في العالم .؟
- هل تعلم أن ال 300 باحث والمتخصص دول الغالبية العظمي منهم دكاتره وان القطاع ده مبينمش وشغالين 24 ساعة لحظة بلحظة بيتابعوا كل اللي بيحصل على الصعيد الاقتصادي محليا واقليميا وعالميا..؟
- هل تعلم أنه يقف خلف ال 300 باحث والمتخصص دول أكثر من 100 قيادي تنفيذي في البنك المركزي، ما بين مدراء ورؤساء قطاعات ووكلاء مساعدين ووكلاء الناس دي هي صفوة الصفوة في القطاع المصرفي والاقتصادي في مصر.. بل ومنهم ناس من الأكفأ في قطاعاتهم على مستوى العالم..؟
- طيب حضرتك بصيت في تشكيل مجلس إدارة البنك المركزي والأسماء والخبرات اللي فيه وكل إسم فيهم يدير اقتصاد قاره لوحده بكفاءه..؟
- طيب معملتش فلاش باك بدماغك لورا كده خمس سنين وشوفت البنك المركزي عمل إيه بشهادة العدو قبل الحبيب.. واذاي قدر بودعم مباشر من سيادة الرئيس انه يسهم في انقاذ اقتصاد مصر من الانهيار بعد تداعيات ثورتين .
- هل تعلم ان البنك المركزي المصري قدم للاقتصاد وللناس ولرجال الاعمال في كافة المجالات من سياحة عقارات صناعة تجارة مشروعات صغيرة مشروعات كبيرة زراعة وصحة رواد اعمال متعثرين غارمين وغارمات قدم لكل دول وغيرهم انا ناسية مبادرات تجاوزت قيمتها تريليون جنيه تحمل البنك المركزي فروقها عشان البلد تكمل وتقف على رجليها منها:
- مبادرة المشروعات الصغيرة والمتوسطة سنة 2016 ومستمرة لحد دلوقتي اللي الزم فيها البنوك بتخصيص 25% من محافظها بفايدة متناقصة 5% لهذه المشروعات وتجاوز حجم تمويلاتها لحد دلوقتي اكثر من 450 مليار جنيه عشان يساعد الناس والشباب يعملوا مشروعات وتساهم في خلق فرص العمل ويتحمل المركزي فرق الفايدة
- مبادرة التمويل العقاري بـ100 مليار جنيه وبفائدة 3 متناقصة تسدد على 30 سنة عشان يساعد الناس الغلابة يحققوا حلم امتلاكهم شقة
- حتى الشركات العقارية نفسها عشان يساعدها وقت ركود السوق وقدملهم 50 مليار جنيه دعم
- مبادرة دعم الصناعة والزراعة ب 100 مليار جني وعدت دلوقتي 200 مليار جنيه بفائدة 8% متناقصة وهو برضو بيدفع الفرق عشان يساعد رجال الاعمال والمصنعين
- موش البنك المركزي ده اللى حارب الجميع وعمل مبادرة لدعم المتعثرين ورجال الاعمال اللي قالوا ع نفسهم انهم فلسوا وعملهم مبادرة لاسقاط ديونهم مقابل انه يرجع يفتح مصنعه ويشغله وينتج ويشغل الناس وتحمل فيها المركزي اكثر من 70 مليار جنيه..؟
هل مثلا الناس اللي عملت المبادرات دي عشان بلدنا تبقى افضل .. حسوا بالذنب وتأنيب الضمير فجأة ف فقالوا م نقلب الطرابيزة عل البلد ونقفلها مثلا .. ؟ موش نفكر ب عقلنا شوية طيب.. ؟
طيب مع التفهم الكامل لرد فعل المستوردين والناس اللي انضمت ليهم عشان دي مصالحهم؟
نبص حولينا شوية ونشوف الدنيا عاملة اذاي اللي خلت البنك المركزي ياخد قرار زي ده ..؟
تعالوا نشوف
- جميع المؤسسات الدولية قالت ان عام 2022 عام هيكون صعب على كافة الاقتصادات في العالم وأن الصمود اللي اظهرته كثير من الاقتصادات أمام تداعيات كورونا خلال 2020 و 2022 هيبدأ يتراجع في 2022 وتبدأ الاقتصادات تتأثر بعد استنزاف مورادها ومخزونات احتياطيها وفوائض ميزانياتها .. ده منطقي ولا موش منطقي..؟
- طيب كلنا شايفين التضخم في العالم عامل اذاي والاسعار ماشية ف اتجاه محدش عارف يوقفها بسبب تأثر سلاسل الانتاج في العامين الماضيين وارتفاع اسعار البترول الكبير السنة من اول السنة وكلنا متابعين امريكا الدنيا مقلوبة فيها وناويين يرفعوا الفايدة 7 مرات زي بيقولوا .. هل حضراتكم متخيلين اثر ده علينا...؟
- طيب العالم اقتصاديا ف 2022 الكل مجمع على انه هيشوف أوضاع صعبة جدا وكلنا متفقين ع ده .. ف نلاقي كمان بوادر حرب عالمية ف اوروبا اطرافها كل القوى العظمى روسيا ودول اوروبا وامريكا .. هو ده ملوش تأثير علينا..؟
طيب تعالوا نبص في الوضع الداخلي لاقتصادنا..
- صادرات مصر عارفين كام...؟ بعد كل الدعم ده عارفين وصلت كام ..؟ طيب وصلت 32 ملياردولار وده اعلى رقم في تاريخها .. حلو نصقف..؟ نشوف طيب رقم الورادات بتاعتنا كام رغم 85 مليار دولار رغم كل الاجراءات الي اتخذت للحد من الاستيراد واراداتنا 85 مليار دولار الفرق بين الاتنين كام..؟ بتعرفوا تحسبوا 53 مليار دولار الفرق بنسدده اذاي ..؟
هل حضراتكم عارفين الفرق ده بيستدد اذاي..؟
الفرق ده جزء كبير منه هو بتضطر الدولة للاستدانة من الخارج بمختلف صور الاستدانة عشان تسدد الفرق ده هل انت كده مبسوط ..؟
الناس كلها بتشكي وبنتنقد ارتفاع ديون مصر الخارجية ال عدت 130 مليار دولار طيب موش علينا نفكر نوقف تزايد الرقم ده ونشوف أسبابه إيه..؟
- طيب ال 85 مليار دولار الواردات دول جايين اذاي .. أكثر من 50% منهم سلع استفزازية وبيدخلنا سنويا اكتر من 4500 سلعة غير مطابقة للمواصفات مجهولة المصدر بتسهم يوميا في القضاء على حياتنا واستنزاف فلوسنا ومرتباتنا..
- الفرق ده رجال الاعمال والمستوردين مشغلين بيه اقصادات دول تانية اجنبية ومشغلين مصانع ومدن صناعة كاملة ف الصين وتايوان وتركيا وغيرها .. هل ده يرضيك..؟
- الفلوس دي موش أولى بيها بلدنا ونفتح بيها مصانع جديدة وتشغل الناس .. ولا لأ..؟
طيب المركزي عمل ايه؟
الاستيراد قبل م نعرف المركزي عمل ايه كان بيتم اذاي .. كان بيتم بطريقة لذيذه جدا جدا جدا فوق الخيال انتوا لما تعرفوا والله هتتضايقوا وتقولوا البلد دي ماشية اذاي
كانت بتتم عن طريق المستورد في مصر بالموبايل يكلم المستورد في الصين يقوله ابعتلي بضاعة كذا وكذا ب 100 مليون دولار وبكره اروح البنك احولك الفلوس ..
ايوة هي دي طريقة مستدات التحصيل .. المورد في الصين يبعتله المستند من الصين ع الموبايل يروح بيه البنك بالفلوس مصري البنك يحولهم للراجل الصيني دولارات
الدنيا كانت سهلة قوي صح.. عشان كده زعلانين وقابلين الدنيا طيب:
حد شاف البضاعة دي كويسة ولا وحشة .. لأ
حد سأل البضاعة دي كويسة ولا وحشة .. لأ
حد يعرف البضاعة دي محتاجينها أصلا ولا لأ .. لأ
حد طيب يعرف البضاعة جت ولا لأ .. لأأ
يعني جزء كبير من عملية الاستيراد بمستندات التحصيل كان بيتسخدمه بعض التجار في تهريب الفلوس خارج مصر .. ينفع كده!
طيب اللي بيحصل ده موش حرام...؟
طيب ده موش استنزاف لموادنا الدولارية ومن العملات الصعبة,,.
طيب ده موش ظلم لنفسنا ولاقتصادنا ول بلدنا ..؟
بلدنا وشبابنا موش أولى بالفلوس دي نفتح لهم مصانع ونشغلهم ..؟
طيب ده موش ضغط على عملتنا المحلية ومخليه اللي يسوى واللي ميسواش معيشنا في قلق وتعويم جديد وتعويم قادم والجنيه مقوم بأعلى من قيمته كلام كتير بيضايقنا..؟
متخيلين يعني لو وفرنا 30 ولا 40 مليار من الفلوس اللي بتتهرب دي ولا اللي بنشغل بيها مصانع واقتصادات دول اجنبية بايدي تجار ومستوردين مصريين عشان مصالحهم الشخصية..
متخليين ال 30 ولا 40 مليار دي لما نوفرها عملتنا وضعها يبقى عامل اذاي ..؟
متخليلين ال 30 ولا 40 مليار دولار وجهناها لبناء مصانع في بلدنا هتوفر كم فرصة عمل .. وهتوفر ادد ايه منتجات نستخدمها لسد احتياجات سوقنا المحلي وكمان نصدرها ونجيبلنا 140 مليار دولار زيها صادرات ,,.؟ محدث فكر ف المعادلة دي ليه..؟ بدل م نبكي ع المستوردين اللي موش بيفكروا غير ف مصالحهم..؟
كل اللي حصل إن البنك المركزي قال لحد هنا .. كافية كده .. نوقف السداح مداح في الاستيراد دي
ورجع آلية الاعتمادات المستندية اللي هي أصلا طول عمرها كانت شغالة ف مصر وكل دول العالم بتستخدمها ..
ومع ذلك استنثى السلع الاستراتيجية الغذائية والادوية واستنيى السلع اللي بالبريد السريع والشحنات الحفيفة اقل من 5 الاف دولار عشان اللي عايز يستورد حاجة عاجلة وقطع غيار مستعجلة وخفض تكلفة الاعتمادات المستندية وسرع اجراءاتها عشان محدش يتحجج.
ايه نتيجة قرار البنك المركزي ده هيعمل ايه:
- هيوقف تهريب الاموال للخارج
- هيوقف استنزاف موارد الدولة الدولارية
- هيساهم في وقف تزايد ديونا الخارجية اللي داخلة على 140 مليار دولار دي بدل م نلاقيها 240 و540
- هيقلص الفجوة الرهيبة بين صادراتنا 32 مليار دولار ووارداتنا 85 مليار دولار
- هيوقف الضغط على العملة المحلية ويقوي الجنيه اللي لو كان الوضع فضل زي مهو كان ممكن الدولار يوصل 40 جنيه فعلا ساعتها اتفرجوا ع الاسعار اللي بيخوفوكم منها دلوقتي
- هيحد من السلع مجهولة المصدر والغير مطابقة للمواصفات اللي بتستنزفنا يوميا وتستنزف جيوبنا
- هيوفر رقابة قوية على الاسواق والاستيراد
- هيحمي الصناعة المحلية وهيخلق فرص اكبر للتصنيع المحلي وبناء مصانع وخلق فرص عمل
- ده هيخلق نمو اقتصادي حقيقي هيعود على كل الناس لانه نمو اقتصادي صناعي خلق فرص عمل بدل م بفلوسنا بنعمل نمو لاقتتصادات دول اجنبية
- بجانب ده البنك المركزي اصلا عاملنا 15 مبادرة لدعم الصناعة والتصنيع في مختلف المجالات تعالوا
كلمة أخيرة.. فيه شريحة من رجال الاعمال كلهم معاهم جنسيات اجنبية وولادهم بيتعلموا في جامعات اجنبية وكلهم عندهم قصورهم وعقاراتهم بره اللي في اي لحظة هتلاقهوهم اول ناس خلعت زي ما حصل بعد 2011 وجميعهم اختفوا وهربوا وهربوا فلوسهم لبره.
ده اللي بيقولك انا خايف عليك وعلى مصلحتك وهو بالعقلية دي متصدقوش .. دي بلدنا كلنا لازم نقف ايد واحدة عشان نحميها.
