627 مليون دولار.. صادرات الكيماويات المصرية للهند تقفز 325%

627 مليون دولار في 8 شهور.. صادرات الصناعات الكيماوية والأسمدة المصرية للهند بتنفجر، وتسجل قفزة استثنائية بنسبة 325% مقارنة بنفس الفترة من العام الماضي

يعني إيه الكلام ده؟ يعني الصادرات المصرية للسوق الهندي زادت بحوالي 480 مليون دولار في سنة واحدة، بعد ما كانت 147 مليون دولار بس خلال الفترة من يناير لأغسطس 2025.

واللافت إن الهند بقت ثالث أكبر سوق مستورد للصناعات الكيماوية والأسمدة المصرية، بعد تركيا وإيطاليا، وده بيكشف عن تحول مهم في خريطة الصادرات المصرية، مع التوسع في الأسواق الآسيوية.

لكن إيه المنتجات اللي ورا القفزة دي؟
الأسمدة والمبيدات جت في المقدمة بقيمة وصلت لحوالي 552 مليون دولار، يعني استحوذت على قرابة 88% من إجمالي صادرات القطاع للهند.

وبفارق كبير، سجلت صادرات الكيماويات غير العضوية حوالي 30 مليون دولار، والمنتجات البتروكيماوية 24 مليون دولار، والكيماويات المتنوعة 15 مليون دولار.

والأرقام دي بتيجي في وقت سجلت فيه صادرات الصناعات الكيماوية والأسمدة المصرية إجمالًا حوالي 8.25 مليار دولار خلال أول 8 شهور من 2026، بنمو 30% مقارنة بنفس الفترة من السنة اللي فاتت.

والتحرك مش متوقف عند التصدير بس، لأن المجلس التصديري للصناعات الكيماوية والأسمدة بيجهز بالتعاون مع مجلس الأعمال المصري الهندي لحدث اقتصادي جديد، يستهدف فتح فرص أوسع للشراكات التجارية والاستثمارية بين البلدين.

فهل تقدر مصر تستغل الطلب الهندي المتزايد، وتحول القفزة دي لانطلاقة أكبر لصادراتها الصناعية؟