الدولار عدى الـ53 جنيه رغم مليارات الدولارات اللي دخلت مصر.. إيه اللي بيحصل في سوق الصرف؟

إزاي الدولار يوصل لأكتر من 53 جنيه رغم إن احتياطي النقد الأجنبي بيحقق أرقام قياسية؟ وليه العملة الأمريكية بتطلع في الوقت اللي تحويلات المصريين بالخارج بتسجل مستويات غير مسبوقة؟ وهل رجوع الأموال الساخنة للسوق المصرية كفاية لوقف صعود الدولار ولا فيه ضغوط تانية بتحرك سعر الصرف؟

الحقيقة إن سوق الصرف في مصر بيشهد تطورات متناقضة.. فمن ناحية فيه تحسن واضح في تدفقات النقد الأجنبي ومن ناحية تانية الدولار بيواصل الصعود قدام الجنيه.

خلال تعاملات النهارده الدولار تخطى مستوى 53 جنيه للبيع في عدد من البنوك.. وسجل أعلى سعر في بنك إتش إس بي سي عند 53 جنيه و8 قروش للبيع.. بينما سجل في البنك المركزي 52 جنيه و90 قرش للبيع.

لكن المفاجأة إن الاحتياطي النقدي لمصر وصل لمستوى قياسي جديد عند 57.35 مليار دولار في سبتمبر.. كمان تحويلات المصريين بالخارج قفزت بنسبة 27.2% خلال أول 8 شهور من 2026 لتسجل 33.9 مليار دولار.

وده غير تحسن الصادرات وإيرادات السياحة وقناة السويس.. وهي مصادر بتدعم قدرة الاقتصاد على توفير العملة الصعبة.

وفي نفس الوقت رجعت الأموال الساخنة للسوق الثانوية للدين الحكومي المصري.. وسجل العرب والأجانب صافي شراء بقيمة 1.2 مليار دولار خلال الأسبوع الماضي.. لكن التفاصيل بتكشف إن العرب اشتروا بقوة بصافي 1.5 مليار دولار بينما الأجانب سجلوا صافي بيع بحوالي 300.8 مليون دولار.

وهنا لازم نفهم إن زيادة الاحتياطي وتدفقات العملة الأجنبية مش معناها بالضرورة إن الدولار لازم ينخفض بشكل فوري.. لأن سعره بيتأثر كمان بحجم الطلب على العملة الصعبة وتوقيت دخول التدفقات وخروجها وحركة المستثمرين في أدوات الدين.