2000 فدان في مشروع المليون ونصف فدان.. إزاي تحصل على أرضك وتسهيلات السداد؟
2000 فدان في مشروع المليون ونصف فدان.. لو بتفكر تدخل مجال الاستثمار الزراعي بمساحة كبيرة، فيه شروط لازم تعرفها، وتسهيلات في السداد ممكن تفرق معاك
شركة تنمية الريف المصري الجديد بتتيح لكبار المستثمرين التقدم للحصول على مساحات بتبدأ من 2000 فدان وتوصل لـ50 ألف فدان، لكن التقديم هنا مش للأفراد بشكل مباشر.. لازم يكون الاستثمار من خلال شركة أموال، سواء مساهمة أو ذات مسؤولية محدودة.
طيب إيه الأوراق المطلوبة؟
هتحتاج السجل التجاري، والبطاقة الضريبية، وعقد تأسيس الشركة، وشهادة بنكية، بالإضافة لدراسة جدوى للمشروع وبرنامج زمني للتنفيذ.
وفيه شروط مهمة لازم تاخد بالك منها: الشركة يكون ليها كيان قانوني في مصر، ورأس مال يعادل 20% من قيمة المزرعة، وعمرها لا يقل عن 20 سنة، مع توافر الأنشطة الزراعية المطلوبة ضمن أغراضها.
نيجي بقى لأهم نقطة: السداد
المطلوب دفعة تعاقد أو استلام بنسبة 20%، والباقي على أقساط تمتد من 9 لـ10 سنين، بفائدة متناقصة 14% على الأقساط.
والميزة هنا إن فيه فترة سماح من 4 لـ5 سنين من غير فوائد، والقسط الأول بيستحق في نهاية السنة التالية لانتهاء فترة السماح.
يعني قدام المستثمر فرصة لتجهيز المشروع وبدء مراحل التنفيذ قبل دخول مرحلة سداد الأقساط.
لكن قبل ما تبدأ، لازم تراجع الاشتراطات كاملة مع شركة تنمية الريف المصري الجديد، لأن الحصول على الأرض مرتبط باستيفاء الشروط والموافقة على المشروع.
